Ass nni n 03 di yebrir iɛeddan, Axxam n Yilmeẓyen « Keddac Ali » s tallelt n Tɣiwant n At Yanni, yerra tajmilt i yinelmaden iẓewṛen n uɣerbaz alemmas « Lɛeṛbi at Ɛemmeṛ » d wid n tesnawit « Si Ḥasen Utaleb ».
Wwin-aɣ nerza ɣer uxxam n tɣamsa « Ṭaher Ǧaɛut », d Temkeṛḍit Taɣelnawt n Lezzayer. Limer mačči d lweqt i aɣ-tt-yeksen tili neẓra-d daɣen asalay n Bardo. Deg uxxam n tɣamsa, nerza ɣer uɣmis n “ La Dépêche de Kabylie”. Newwi- asen tameqqunt n ijeǧǧigen d tarzeft iwaken ad ten-nesenemmer imi aɣ-ssebɣasen ad naru s teqbaylit deg uɣmis -nsen. Din, s lferḥ i aɣ-d-mmugren yiɛeggalen n uɣmis- agi, gar-asen imḍebbeṛen mass Smaɛil Merzuq d mass Ben Yeḥya. Neqqim kra n lweqt nekni d yineɣmasen nni. Rran-d ɣef tuttriwin- nneɣ yerna mmeslayen-aɣ-d ɣef wamek yedda usufeɣ n yisebtar s teqbaylit deg uɣmis. S yin nerra ɣer Temkerḍit Taɣelnawt n Ḥamma. Deg-s i ḥerzen later n zik d umezruy n tmurt -nneɣ. Mlan-aɣ-d yimḍebren-is amek i tetteddu temkeṛḍit. Seg mi akken meqret temkerḍit ur nessaweḍ ara ad d-nẓer kra meṛṛa tesɛa. Ad nessali awal ɣef tirza- agi s usenmer n wid tt-id-iheggan, d wid i aɣ-d-immugren ama deg uxxam n tɣamsa, ama di temkeṛdit taɣelnawt. S unecṛeḥ d lfeṛḥ i temlal tmazɣa d warraw-is. Imi d nekkni i d tafat uzekka, s yes -neɣ ara tbed tamaziɣt ur tnegger ara.
Agraw n yinelmaden n tesnawit
Si Ḥasen Uṭaleb