Ass-a, imedyazen am Si Muḥ Umḥend, Yusef Uqasi, Si Lbacir Amellaḥ, Si Muḥend Ulḥusin, uklalen asnemmer sɣur-nneɣ, acku, ɣas ma deg tallit-nsen, awal azwaw yedder d imawi, maεna s yisefra-nsen, d ucebbeḥ n wawal ssawḍen ẓẓan lehḍur-nsen ɣur medden, ladɣa tulawin. Tineggura-ayi ddment-ten, sselḥant-ten seg iles ɣer wayeḍ deg teɣzi n yiseggasen, aya, yeğğa tutlayt tazwawt ad teṭṭef deg iman-is almi i d-telḥeq tallit n tira.
Amaynut n tmedyezt tazwawt ass-a… deg tfaskiwin :
Tamedyezt tazwawt tamirant, ur d-qqareɣ tfaz, maca zemmreɣ ad d-iniɣ tessecṛah, tella tgerrez, tella d talemmast, tella d tabujadt… imi ṭṭuqtent deg-s tmuɣliwin, ama ɣef tlufa n ddunit, ɣef timmeɣnest, ɣef tifelseft, ɣef tayri atg…
Daɣen ula d tamedɣezt n tuzzuft tella deg annar, yerna tebda la tettbeggin-d iman-is, deg timawit ladɣa, akked uẓeṭṭa. Ma d ammud hatan wer εad yesεa tabɣest umeskar ad yessufeɣ ayen yettaru ɣef uyennat. Mačči d ayen yessuhamen, ma neẓra dakken imedyazen am Si Muḥ Umḥend akked Si Lbacir Amellaḥ ẓewwṛen aṭas deg isefra-yen, yerna deg tmida tis-mraw-tẓa.
Amaynut mačči drus ay d-yellan, aṭas n umaynut ay d-yennernan i tmedyezt tazwawt, ma nεedda seg talɣa, ɣer usentel, tugniwin, asugen neɣ (la métaphore), tmedyezt umu qqaṛen “tamedyezt n yiɣsan“, akked yiwet n tmedyezt, ad iniɣ “tasehlant“, acku ulac deg-s tameɣṛut, qqaṛen-as “tamedyezt tilellit“. Ayagi akk yennulfa-yed deg yiwen n wakud d awezzlan maḍi maḍi, ahat annect-a akk yettuɣal-d i uqeddic n kra n tdukkliwin tidelsanin, ama n Bgayet, n Tizi, neɣ n waɣiṛ wayeḍnin ay d-yesnulfan tifaskiwin n tmedyezt anda At wawal ttemεanaden, ttemyizwaren s tezdeg n wul gar-asen, maca daɣen ttembaddalen tiktiwin, acku ur ttwalin ara timlilit d amsizwer, wanag d tagnit i umeslay, d umcaweṛ ɣef wayen ad ten-yerḥan.
Aqqa aberkan :
Ayen akk yessḥissifen ɣur-i, d yiwen n ṣṣenf n tmedyezt ay bɣan ad yesseɣli, neɣ ahat tesseɣli yakan tamedyezt-nni n yiḥulfan, tagi d “tamedyezt yettwabnan“ : ameskar-is ibennu-tt d lebni, wissen deg ayyur neɣ deg sin neɣ ugar, yettḥuc-d taktiwwin sey-a d sey-a, ladɣa seg ayla abeṛṛani, taggara ad yessamed asefru ara d-yilin tikwal yejhed, ɣas ma yella win yellan d amedyaz izemmer ad ifiq ma s tehregt ay yettwaru.
Mhenni Xalifi