Illa zzman yiwen n urgaz, ixeddem ur isεi deg wul-is tifenyent wala laεgez, acku iḥsa lγella tettas-d s laεtab, ihi isnejmaε-d arraw-is, ihedder-asen, ineṣṣeḥ-iten i wakken ad ẓren belli lxiṛ deg ttidiren yusa-d s laεtab akk d ccqa, ur illi id-ittebwan weḥd-s, yerna afenyan ikreh-it lfaεl-is.
Maca tarwa-s zzhan di lxiṛ, tteklen γef baba-tsen, lqut deg uxxam yewjed acimi laεtab yal ass?
Segmi iten-iwala baba-tsen, mačči d uḥdiqen, u netta d amγar, isawel-asen, nejmaεen-d inna-asen: -A tarwa.
Nnan-as: -Anεam.
Inna-asen: -Bγiγ a kwen-weṣṣi&gamma,; ma illa mmuteγ γurwat aql-i ffreγ yiwen ugerruj deg wakal nneγ win ara t-yafen yawi-t.
Nnan-as: -A baba mel-aγ-t a t-id-nawi mi akka telliḍ, bḍu-aneγ-t s lḥeq.
Inna-asen: -Ala, agerruj ulac win ara t-id-inadin siwa ma mmuteγ.
Asmi i iwweḍ wass n umγar, arraw-is uγalen γef leqrar armi ikfa, uγalen s kra n wayen ṛwan, ctaqent.
Inṭeq-d yiwen seg watmaten-nni: -Mačči inna-aneγ baba ad fell-as yaεfu Ṛebbi, belli iffer agerruj?
Nnan-as: -S tidett.
Inna-asen: -Yyaw a t-nqelleb yal yiwen neγ yal sin ad ṭṭfen iger alamma nufa-t, a t-nebḍu d atmaten.
Nnan-as: -Neqbel.
Inna-asen: -Ddmet-d iqubac imegran gellbet akal, kset aẓru alamma ibaned ugerruj iffren, imiren ishel beṭṭu.
Ruḥen acḥal d ussan ttin-d akk igran-nsen, armi win iten-iwalan iγil kerrzen s yilfan, ur d-iban wara, la agerruj la tawizett.
Inṭeq yiwen seg-sen: -Ay atma d acu tennam?
Nnan-as: -Naεteb baṭel.
Inna-asen: -Tura ay atmaten takerza i waεren aql-aγ nxedem-itt, yyaw meqqar a nezreε irden, d lεib aγ-d-walin medden nekrez ur nezriε.
Akken i teḍra zerεen igran-nni, armi-id-ufan iman-nsen la meggren naεma, jemεen rnan zağwen, yuγal inṭeq-d wuḥdiq gar-asen: -Ay atmaten ziγ s tidett illa ugerruj.
Yeḥya Yanes.