S trugza d yise&gamma,; seld sebɛa n yiseggasen n tsusmi i izedlen γef taddart n Tefrit deg yal aḥric, ama d idles, ama d tussna, ama d addal … Tiddukla TIGEMMI n Tefrit (taγiwant n Uqbu), i d-ilulen kra n wagguren-aya kan, tessaweḍ ad tesseγres ssnasel yurzen allaγen d yifassen, terẓa asalu, u tenğer abrid n yimal i tarwa-s ; abrid n yidles d umezruy, abrid n tmussni d tafat, abrid n tẓuri ideg ara lḥunt tsutwin i d-yettlalen yeffuden tafat d usirem.
Tiddukla TIGEMMI n Tefrit d tiddukla tadelsant i yettnaḍaḥen γef yidles d tgemmi tansayt i aγ-d-ğğan yimezwura-nneγ ; ahil-is yerza aṭas n yiḥricen ladγa aselmed n tutlayt tamaziγt ; asmekti d usfuggel n tfaskiwin tidelsanin yecban Yennayer d 20 Yibrir ; asufeγ n warrac ilmeẓyen akken ad ḥewsen γer yidurar d tγalti n tmurt-nne&gamma,; ladγa akken ad ten-tessaki γef temsalt n useḥbiber γef ugama d twennaḍt. Seld asmekti n yennayer 1963 d Tefsut Imaziγen 80 ; amalas yezrin, tiddukla Tigemmi n Tefrit, terra tajmilt i yiwen seg yirgazen-is, wa d Muḥend u Harun (1949-1996), ameγnas n tmaziγt d tugdut i yesɛeddan 11 n yiseggasen d uzgen deg lḥebs n Lambèse akken azekka ur yettuγal d aẓekka ! Ahil-a yebda s usrusuy n yijeğğigen γef uẓekka n umeγnas-a, syin akkin yella-d usarag n Mass Ahcene Cherifi ameddakel n Harun i d-yesɛeddan yid-s lḥebs azal n 8 n yiseggasen. Ass wis sin, d Mass Rachid Ali Yahia i d-yewwin asarag γef tezγent tamaziγt (crise berbériste) n 1949 deg tzeqqa n cinéma deg Uqbu. Ahil yekkfa s yiet n tmeγra tameqqrant i d-yellan deg uγerbaz amezwaru n taddart n Tefrit, anda cnan waṭas n yicennayen, gar-asen Ali Ideflawen, tarbaɛt Izenẓaren, groupe Algérie Berbère, Loualia Boussad, Mehana Ouzaid d waṭas-nniḍen ; akken diγen i d-tella tceqquft n umezgun i d-turar yakan terbaɛt Tigemmi n Tefrit s uzwel ‘’Ameḥbus’’ d tajmilt i Harun, akken diγen i tecna terkeft (chorale) n tiddukla kra n tezlatin i yezzuznen wid i iḥeḍren deg tmeγra-yagi. Tameγra tekkfa ass n 24 di Maggu γef 03 n sbeḥ, dacu kan ahil yettkemmil, imi ass n 31 deg waggur n Maggu i tebda temsizelt n ddabex-uḍar (tournoi de foot-ball) ideg ttekkint azal n 24 trebbuyaɛ ; d tajmilt i Muḥend u Harun akk d Si Beẓẓa, sin n yirgazen-a i d-yeffkan aṭas ama i yidles ama i tqermi. S wakka tiddukla Tigemmi n Tefrit, tessaweḍ ad terz asalu n tuggdi d tsusmi, u ad tenğer abrid-is γer sdat, nessaram-as afud igerrzen deg leqdicat-is.
Larbi Yahioun