Mačči d kečč i d amenzu
I yemmuten urd as-teččur
Tudert s yiccer tettezu
Win teɣder deffir s aɛrur
Ad t-tdel s wakal d uzezzu
Ad teḥzen fell-as aggur
Ɣellin yirgazen am lexrif
Nedder tudert n bessif
Tagrawla, allaɣ tesɛa
Ittxemmim amek ad tefru
Iẓri n wayeḍ s azekka
Amek ad yuɣal d aqerru
Remḍan gren-t s aẓekka
Rnan ɣur-s akukru
Ɣellin yirgazen am lexrif
Nedder tudert n bessif
S yisiḍ ugaren lewḥuc
Ur ssinen aḥezzeb
Sɛan kan ala axenfuc
I d-yessufuɣen lekteb
S aɛdaw zzenzen Ɛmiruc
Abrid n ccyaxa ad yerḍeb
Ɣellin yirgazen am lexrif
Nedder tudert n bessif
S ufus-is yensa lbarud
Tamurt tewwi tilelli
Yedder iseggasen n rrɛud
Yiwen usennan ur t-yenti
Belqasem rẓan-t deg wafud
Ugaden tidet ad d-tali
Ɣellin yirgazen am lexrif
Nedder tudert n bessif
Aselway n Lezzayer yemmut
Lezzayer mazal tedder
I ɣ-d-ittmmagaren d tafsut
Ay imukar d yicumar
Tɣunfa-ken aṭas tmurt
Tḥemmel at n tidet d tinzar
Ɣef Lezzayer ad ikkes uɣilif
S lmend n yirgazen n nnif.
Malek Houd