Imezdaγ n taddert Ahriq n tγiwant n Wizgan, sudsen-d yiwen n leqdic s wazal-is, tagi d tafaska n tzizwa d tament di tezrigt-is tamezwarut, iyeldin tiwwura-s s wudem unṣib ass n 15 γuct deg aggur i deg nella, s leḥdur n yemḍebren n temnaḍt n Wizgan, ger-asen aselway n dayra d uselway n tγiwant n Wizgan, d yemḍebren n yeḥricen yemgaraden n lwilaya n Tizi-Wezzu. Tamesbanit-agi yesduritt-id webraḥ n baylek n taddert Ahriq, anda i yukkan s nnig n 20 n yemzikniyen id-yussan si temnaḍin n lwilayat yemgaraden am Tizi-Wezzu, Bumerdes, Bgayet d Tipaza. Ahil n leqdic d amarkanti u d amesbaγur, anda llant temzikniyin n leṣnaf yemgaraden n tament d wamek ttrebin tizizwa, akken daγen llan isaragen d temliliyin sγur imusnawen n tfellaht γef azal sεant tzizwa d lfayda n tament di tezmart n wemdan. Akken tella daγen d tagnitt yelhan i usebγes n yifellaḥen d tikci n kra iwellihen iwulmen d wafud yelhan i usufeγ n lγella-agi i usnarni n tdamsa n tmurt. Si tama niḍen yella-d usaḥbiber d uḥḥesses n yemdanen γef dema uḥareb γef twenaḍt, imi tizizwa ttidirent di tezdeg. Tamesbanit-agi tella-d s lemεawna n tesqamut n taddert Ahriq, u seddaw laεnaya n Wesqamu Aγerfan n ugarzu n Tizi-Wezzu, Tamahla n yedles n Tizi-Wezzu, Asqamu Aγerfan Aγiwan n Wizgan. Leqdic yedda s teγzi n 04 n wussan u dwin iεeddan di tegnatin yelhan.
Islam Bessaci