Tamhalt n yiniliyen d tin i d-ixelqen lxuf d ccek gar yimjuhad. Tella-d s lmendad n capitaine Léger‶ ass 01 meɣres n useggas n 1958. D yiwet seg temhal i tessemres temhersa tafransist, i wakken ad temḥu tagrawla deg waɣir wis kraḍ, acku twala d akken imezdaɣ n waɣir-a ttwasnen s tebɣest akked leḥmala n tmurt-nsen. Ihi tamhalt-a, tella-d mbaɛd mi i tessexdem temhersa inelmaden akked yigumiyen deg yigen n uslelli aɣelnaw(A. L. N). iwakken ad sɛun issalen ɣef yimjuhad. Maca, imḍebber n waɣir wis kraḍ « Ɛmiruc Ayt Ḥemmudda » ifaq i temhalt-a asmi i t-id-yewweḍ lexbar seg yiɛeggalen n temnaḍt tis ukuẓ (région 04), dakken agensas asertan » Si Lḥusin Salhi » iḥemmel aṭas iruḥ ulac isali fell-as. Dɣa, iruḥ » Ɛmiruc » ɣer din yemlal-d aɣella(chef) n temnaḍt-a « Si Ḥsen Meḥyuz » akked unmaẓul-is « Si Lɛerbi » wekkden-as-d dakken agensas « Si Lḥusin » ur d-iban ara. Anect-a yessekcem asudru (ccek) deg « Ɛmiruc » belli llan wid i yettaken isallen ɣef yimjuhad i yigen n Fransa, ladɣa mi i yeẓra dakken sani ara yerren ad afen lɛesker iɛuss-iten-id. Rnu ɣer waya, yufa-d deg yiwen n useqqif (abri) snat n teqcicin i d-yusan seg temnaḍt tilellit dakken imḍebbren n temnaḍt-nni ceyyɛen-tent-id ɣer temnaḍt tis ukuẓ iwakken ad tent-skecmen ɣer tegrawla, acku tamsulta n Fransa tettnadi fell-asent mbaɛd mi i d-rewlent seg lḥebs n Serkaǧi . Maca, anect-a ur iseḥḥa ara imi yiwet seg-sent isem-is « Ruza » tbeyyeɛ-d dakken d ″ capitaine Léger″ i tent-id-iceyyɛen iwakken ad as-fkent isallen ɣef tuddsa n yimjuhad deg tmurt n leqbayel, rnu daɣen wekkdent-d dakken « Si lɛerbi » i yellan d anmaẓul(adjoin) n yimḍebber n temnaḍt tis ukuẓ n waɣir wis kraḍ ixeddem akked « capitaine Léger » yerna d netta i d ssebba n lmut n ugensas « Si Lḥusin Salḥi » acku d netta i t-ibeyɛen i yirumyen nɣan-t . Ɣef waya, tadyant-a teǧǧa-d aṭṭan meqqren gar watmaten imi ruḥen azal n 400 n yimjuhad deg leɣlaḍ, llan wid i yemmuten llan wid i iɛettben s tiyta ɣas akken ur uklalen ara ayen i asen-yeḍran. Ma d imeḥbas uɣalen imḍebren n waɣir-a ɣef uqerru-nsen »Muḥend u Lḥaǧ) serḥen-asen acku faqen d akken d tamhersa i asen-ixedmen tamhalt-a iwakken ad d-xlaq lxuf d ccek d umennuɣ gar watmaten n tegrawla.
Bousbaine Samir.