Mebεed imi d-yerra acḥal d asaru γer teqbaylit, tikelt-a, Samir Ait Belkacem yessezga-d (adapter), netta d terbaεt-is, BEBE LILLY γer teqbaylit.
Leqdic-a dayen igerrzen nezzeh imi dγa yeεna arrac imecṭaḥ. Amek wakken neẓra, amur ameqqran n wayen i d-itteffγen s tmaziγt yecγeb imeqqranen. Leqdic am wa, yezmer ad yili d yiwen wallal gar yifassen n yiselmaden n tmaziγt ma bγan ad slemden i warrac idles amaziγ s umata imi ayen i d-yewwi usaru-a icudd γer tmetti ines. Akka, dγa, ara naf kra n tmucuha timeẓẓyanin, kra n tezlatin akked wurar s yisteqsiyen ifessasen γef yidles amaziγ s umata aya akk s ṣṣut n Bellali Fella, nettat d yiwet n teqcict i yuraren deg yisura i d-yerra γer tmaziγt Samir Ait Belkacem i aγ-d-yemmeslayen γef yiswi n ussezgi-agi, yenna-d :’’Bebe Lilly, yuγal-d γer waṭas n tmeslayin, i wacuγer ihi ur t-id-nettarra ara nekni γer teqbaylit ladγa imi annar-agi n ussezgi ha-t-an d asuki ? Tis snat, nebγa ad yili i warrac imecṭaḥ (gar 2 d 7 n yiseggasen) d yiwen n ttawil s wayes ara lemden idles d tγerma nsen s wurar akked neccraḥa…’’
Hocine .M