Mbeɛd mi gtent ccikayat n yimseqdacen (utilisateurs) imazɣawalen n facebook, ɣef usteεref s tmaziɣt d tutlayt n taywalt (communication) deg uẓeṭṭa-ya imetti; ussan-a iεeddan imḍebbren n tkebbanit-a qeblen asuter-a, rnan s wudem unṣib tamaziɣt ɣer lejrida n tutlayin iss iqeddec wadeg-nsen. Deg wulɣu i d-uran yimḍebbren n facebook i d-ssaẓergen deg wadeg-nsen, nnan : » Neqbel ad tili tmaziɣt ger tutlayin ara yettwaseqdacen di facebbok, imi aṭas n yisutren i aɣ-d-yusan seg yigduden n tmura n Tmazɣa, ad nesnemer aṭas wid akk i aɣ-d-yuznen isutren-nsen ɣef temsalt-a ». Ad nesmekti kan dakken asurif-a i tger tmaziɣt deg wayen yerzan asemres-is deg tiknulujiya n yisallen, yella-d aseggas mbeεd mi tekcem s wudem unṣib deg windows 8… Mazal lxir ar zdat!
M. C