Seg wass n 15 mayu 2013, i tebda tesnurayt n yisallen (agence de presse) tunṣibt n tgelda n Lmeṛṛuk umi sawalen MAP (Tasnurayt n Lmeɣreb Aɛrab i Tɣamsa) asiẓreg s wudem unṣib isallen s tutlayt n tmaziɣt. Asenfar-a i t-ixedmen d aɣlif n yisallen n tmurt n Lmeṛṛuk s lemɛawna akked Usinag n Tussna Tamaziɣt ( IRCAM). Ɣef wakken i d-yenna i tɣamsa uneɣlaf n yisallen n Lmeṛṛuk mass Mustapha El Khalfi ɣef temsalt n useqdec n tmaziɣt deg tesnurayt MAP : » S usekcem n tmaziɣt deg tesnurayt tunṣibt n yisallen n tmurt, nefka-d udem n useɛdel n tutlayin yellan di tgelda, aya daɣen yekcem deg usenfar n uneṣṣeb n tmaziɣt am wakken iress di tmendawt ». Da di Lezzayer ar wass-a tasnurayt tunṣibt n yisallen APS tesseẓrag-d kan s taɛrabt d tefransist, ula d yiwen n yimḍebber neɣ xersum imeɣnasen ma yemmeslay-d ɣef temsalt-a, ɣas ma tamaziɣt seg useggas 2002 i tekcem di tmendawt n tmurt.
Mokrane Chikhi