Tayri, leḥmala, laɛceq, lemḥibba,… gar wawalen yettawin ttarran s waṭas, tineggura-yagi, gar yimi d umezzuɣ. Ladɣa ɣer yelmezyen d telmezyin. Di tallit ɣer tayeḍ, gar tmurt ɣer tayeḍ, gar taddart ɣer tayeḍ, gar wexxam ɣer wayeḍ, gar wemdan ɣer wayeḍ, gar yiwen wemdan deg teswiɛt ɣer tayeḍ, anamek n wawal n tayri yettbeddil. Leḥmala, akken tettwalin ak medden, d aḥulfu-nni rqiqen d-yettasen deg lqaɛ n wul. D aḥulfu yettwakbalen deg waṭas n teswiɛin acku di tmetti-nneɣ d lɛib ad d-yini yiwen ḥemleɣ. Tayri, di tmura n Leqbayel sumata, d awal ur seqdacen ara yemdanen s waṭas. Zzik-nni ur t-seqdacen ara maḍi, xarṣum ɛinani. Aṭas n yemdanen deg makken ur t-sexdamen ara ur ḥṣin ara d acu i yebɣa ad d-yini. D lmuḥal ad d-yecceḍ yiwen gar imawlan-is w’ad d-yini ḥemleɣ. Lɣaci uɣalen tthabin ad smuzegten i wawal-agi ula ɣer tilizrit (télévision) neɣ ɣer umaṭaf n radio, ladɣa ma llan at wexxam nejmaɛen-d akken llan. Tyri-agi tthabin leqbayel maci d tin yellan kan gar ilemzi d tlemzit, ula d atmaten gar-asen ur ttemyeqqaren ara awal-agi. Ababat ur yezmir ara ad yinii mmi-s ḥemleɣ-k. Tarwa, ula d nettat, ur teqqar ara i ymawlan nḥemmel-iken. Kullec yettɣima deg wul, tettuɣal-as tadimt. Di tagar-yagi, ma nagger tamawt, n-ettwali d akken tbeddel lḥala, ulama maci s waṭas, acku ciṭ xir n wulac. Imdanen ur ttuɣalen ara d izeggaɣen ma slan i wawal n tayri. Bdan ttaken azal i tnefsit-nsen sufuɣen-d ayen yettayzagen daxel-nsen. Uɣalen tteglamen-d, melba akukru, iḥulfuyen-nsen ɛinani.
Zenia T.