Seld 9 n yiseggasen n uraju, imawlan n tmezduɣin 50 LSP ɣelqen abrid Ass-nni n lexmis yezrin, imawlan n tmezduɣin 50 LSP n temdint n Uqbu, ɣelqen abrid aɣelnaw wis-26, mebɛed 10 n yiseggasen n uraju i wakken ad kecmen ɣer tmezduɣin-nsen, ’’ Imdebber n tkebbanit yestukelfen s lebni n tmezduɣin-agi LSP, yugi ad ikemmel lxudma di tmezduɣin-agi i wakken ad ifek tisura i yimawlan-nsent ma yella ur d-rnin ara adrim . ¨Xas akken ssuma n swayes itent-uɣen msefhamen fell-as di tazwara yerna yettujerd di lkaɣeḍ i stenyan, azal 200 melyun sentim i uxxam lexlas ’’ i d-yenna uselway n tdukla n yimezdaɣ . Ugur–agi, d aqdim, seg wasmi ḥebsen lecɣalt n lebni imiren ibdan yimawlan n tmezduɣin-agi ikeččem-iten unezgum . Bdan tazla, uran i lwali…atg. Uran tabrat i uneɣlaf n tmezduɣt. Ayen yesserfan tiwaculin-agi, d taɣuzi n ubrid yettawin ɣer tewwurt n lbatimat-agi sɣur takebbanit i tent-ibnan. Dɣa, fɣen-d imawlan-nsent s abrid, ass-nni n lexmis, i wakken ad d-beggnen lɣiḍ-nsen. ‘’Mačči d imsebriden i nebɣa ad nḍur s uqfal-agi n ubrid , i kra n tsaɛwtin , ad aɣ-surfen kan, d arraw-nneɣ i nebɣa ad nesdari , naɛya di lekra ‘’ i d-yenna Abdenour benhamouche d yiwen n uɛeggal n tdukli n yimezdaɣ . Ad yeqqim usirem n tifrat iɛellaq , ma d imezdaɣ gezmen-tt di rray ur ttuɣalen ara ɣer deffir alama kecmen timezduɣin-nsen .
B.Benhamouche