“Aya mačči d amaynut; d ansay aqbur ɣer yimesdurar. Yella seg zik-nni. Mi ak-nnan bdan jebbun-d ilemlumen n lexrif di taggara n ɣuct,..” Win ara yaɣen abrid d asawen, ɣer udrar n ṭɣiwanin n Yilulen Usammer, Iɣram, Icellaḍen, deg lwilaya n Bgayet, deg ussan-agi n taggara n texrif , ad as-d-yettban wabu n tmes ɣef udrar n Yicelladen . D imeksawen i tt-yessaɣayen. Anect-a, d yiwen gar lecɣal n tsemhuyt n umwan (lexrif) ixedmen yifellaḥen. Maca, aya mačči d amaynut; d ansay aqbur ɣer yimesdurar. Yella seg zik-nni. Mi ak-nnan bdan jebbun-d ilemlumen n lexrif di taggara n ɣuct, ad bdun yimeksawen ad skarayen times deg udrar ansa yeṭṭef ugensiw. Ttqissin-t, tama s tama, alamma yerɣa wayen yellan d lmecmel, berra i lemluk d lɣella. s tefransist qqaren-as: ”l’écobuage.”
Mi ara ad d-bdunt kan akken legrur n tagara n lexrif, ixellef-d wurɣu-nni; yettak-d adles d aleqqaq. D winna i d- ttḥucun yifellaḥen di lawan n yiweǧǧiben d ccetwa i yezgaren n tyerza. D leεlef i d-yettasen melba adrim yerna bnin, iḥemmel-it lmal. Dinna i ikess lmal amectuḥ, melmi fukken ssmadiḥ n usemmid alamma yedled udfel tiqucac n yidurar . Amkan-nni yerɣan qqaren-as, deg yilulen usammer: Urɣu. Mačči ala imeksawen d yifellaḥen i itezzin ɣer wurɣu, ula d iseggaden d warrac yettandin tixeftin ḥemmlen ad ndin dinna . gar-ak ad tekcem ccetwa, yettuɣal wurɣu d agni n yifrax yecban zzerzur d umergu. “Deg wurɣu kan i ttandiɣ nekkini. Dinna i d-ttaṭṭafeɣ aṭas!», i d-yenna Karim akkedd Snusi At Lḥusin , sin yilmeẓyen n taddart Lmecta. Ttextirin yifrax urɣu imi yettishil dinna uxeggeḍ d unadi ɣef twekkiwin.
Brahim B.