Aṭas n yimdanen i isnen Mucat deg uzeṭṭa n facebook, ladɣa s tezlit « lɣaci », « la foule » n Edith Piaf i d-terra ar ta nneɣ. Maca, mačči ḥala “la Foule” i d-smuḥyet. Aṭas n tezlatin n yicennayen nniḍen i d-tesuqqel. gar-asen: J.Brel, Gainsbourg, Renaud.
Cbaḥa d sser n teqbaylit ufraren-d deg wayen tecna, ar ass-a. Tugem-d seg wayen akk imelḥen di ddunit, di tutlayin nniḍen, terra-t s irebbi n teqbaylit. Deg waya tecba aṭas Muḥya: ur d as-teqqareḍ ara belli seg wanda nniḍen i d-tugem. Ayen d-tesmuḥuyet yettbini-d am akken di teqbaylit i yuɣ aẓar.
Ɣef usuqqel atan cwiṭ seg waṭas d-tenna Mucat : “M’ara d-nerr ayen yellan ar wiyiḍ ar teqbaylit, mačči d lexṣaṣ ay nxuṣ neɣ d tazmert ur nezmir ara a d-nexleq. nNettawi-d s-ɣur wiyaḍ :
1) i wakken a d-nerbeḥ lweqt,
2)Dunnit, d ajeṛṛeb, ilaq-aɣ ad nestfaydi deg wayen d-xelqen wiyiḍ. Kra d-ittnulfun ass-a, i d-innulfan iḍelli, ara d-innulfun azekka, yella wayagi ! Nettaɛawad kan i yeɣsan asebb°i, daya !” Tettwali Mucat belli tasuqqilt neɣ, asmuḥyet, si tutlayt ar tayeḍ, mačči dayen i isehla. Tenna-k : “mara d-nerr ayla n walbaɛḍ ar ɣur-neɣ, ilaq ad as-nruḥ s laaqel kan, ilaq a nefhem acu d yeqqar, acu yebɣa a d-yini, acu d-yura ; ilaq a s-neqqim s wannuz, ad t-nḥader axater mačči d ayla nneɣ. Winna i t-yuran neɣ i t-yecnan, ur ilaq ara ad ittwaxdaɛ, ilaq ad d-nini ayen I d-yenna, mačči ayen nebɣa nek°ni a t-id nini. Tegg°ra-d : tiririt-agi si tmeslayt ar tayeḍ, mačči ar imeslayen kan iɣer tcudd ; tcudd diɣen ar yidles. M’ara d –terreḍ asefru neɣ taktabt neɣ ayen nniḍen si tmeslayt ar tayeḍ, ilaq-ak diɣen ad tissineḍ idles n wid i d-tettarraḍ ar tmeslayt-ik. Lecɣal agi n westerǧem, mačči d ayen isehlen axater xilla n tɣawsiwin i ilaq bnadem ad yerr ddehn-is ɣer-sent, wamag ayen ara d-yexleq ḥedd, ama d tira neɣ dayen nniḍen, ines, d ssuq-is ; yezmer a t-id-yini akken i s-yehwa imi d netta i d bab-is, d netta i d imsewweq-is. Ma yehwa-yas ad ibeddel awal neɣ anziz neɣ lmaɛna, ar ɣur-s ay tella, ulac w’ara d-yasen a s-yini mačči akka”
I wid s-yeqqaren :”ur nezmir ara ad d-nerr aya d uya ar teqbaylit», tenna Mucat :
“Taqbaylit acki-tt ! ma tqubleḍ-tt s wayen yelhan, ad ak d-err ayen yelhan. ma tqebleḍ-tt akken tella kan, mačči akken tebɣiḍ keč ad tili, aṭas ara d-kseḍ seg-s. Kulec yella deg-s. Aṭas i wumi selleɣ qqaren ur nezmir ara ad d-nini aya d uya s teqbaylit, neɣ “s teqbaylit ay tt-ruɣ” . Netta, taqbaylit, ma truḥeṣ-as s wannuz, ma tella-yak s tidett deg wul, ma twennaɛḍ-as tamkuct deg wallaɣ-ik, d nettat s timmad-is ara n-yaɛnun iles-ik ; d nettat ara k-id issenṭqen. Ur tewɛir ara teqbaylit, nek°ni ur s-nessin ara, ur tt-nessin ara ”
Aya d cwiṭ seg waṭas i meɛnen i d-tenna Mucat. ad d-nuɣal deg ledwar d-teddun s telqay s amacwar-is d tmuɣliwin-is.
Ad nerr lwalha belli ad tettekki Mucat deg festival Edith Piaf ara d-yilin ass n 13 di tuber gar 14hs d 16s.
S.O.A.