Ass n ssebt 05 deg Tuber deg nella, tella-d tlalit n tiduklla Mestṭafa Baca deg uxxam n yidles Lmulud At maɛmer din Tizi Wezzu. Aya, imi tessawel twacult-is i yimddukal-is d yineɣmasen n tmaziɣt, n tugdut, n yizerfan n wemdan, n yikabaren d tiktiwin yemgaraden. “Am akken I d-yenna Mestafa s timad-is: aṭas I d aɣ-ferqent tektiwin, d lawan aɣ-tesmilil tmaziɣt. Nek awen-iniɣ d lawan aɣ-yesmlil Mestafa», d-yenna Ali, gma-as n Mestafa Baca. Ad d-ner lwelha belli tasbeddit-a tlul-d, 19 n yiseggasen mbaɛd tametant-is, i-d yellan i, ass n 8 ɣuct. Awal ɣef uneɣmas Mestṭafa Baca ɣezzif am usurif n tuder-is d yimenɣi-ines mgal adabu iḥkmen s lebaṭel. Mestṭafa Baca ilul deg useggas n 1956 deg Tasaft Ugemun deg tɣiwant n Ibudraren, deg At Yani anida yeɣra deg uɣerbaz amenzu am akken yeɣra ɣer imerabḍen irumyen deg useggas n 1968/1969. Am akken ig kemel anelmed ines deg tesenawit Amiruc n temdint n Tizi Wezzu gar iseggasen 1972/1976 anda d-yewwi-d bak. Ilmed tusna n tdamsa deg tesdawit n Ben ɛeknun, maca ur ikemel ara leqraya-s, imi iswi ines d tamaziɣt d tugdut. Tella-d tuṭfa-ines deg tedyanin n tefsut n yimaziɣen n 1980, imi yella gar 24 n yelmaẓyen yettwaṭffen. Yettusereḥ-d deg waggur n ɣuct mebaɛd imi I d-yella ucaraɛ ines. Tella-d tuṭfa ines I tikkelt tis snat deg 1981 ilmend n leqdic-ines deg wannar n tsertit d yizerffan n wemdan. Si tamma niḍen yeqdec deg waḥric n syndicat u yella deg temlilit n Iɛkuren ɣef temsalt n tmaziɣt. Yettekka daɣen deg Groupe communiste révolutionnaire. Am akken I iselḥa l’Organisation révolutionnaire des travailleurs (ORT), u yella d yiwen gar wid i-d yesbededen akabar n tugdut d yedles (RCD).
Dalila I.