Ussan εedan rruḥen, uwen-d wiyaḍ s deffir-sen, almi id-zzin 24 n yiseggasen γef ass mi teggujel Nejma, 24 n yiseggasen γef ass mi yemmut uzamul n tsekla Tazzayrit,Baba-s n Nejma, win id-yeffkan tafat n tmusni ara icaεlen ilebda swayes ara wallint tsutiwin id-iteddun, wagi d Kateb Yasin. Tudert n Yasin d amecwar u d amennuγ γef tidet akk d izarfan n wemdan. Ilul ass n 6 γuct aseggas 1929 di temdint n Qsenṭina, deg usamer n tmurt n Lzzayer. Labaεda mi yekcem γer uγarbaz uselmed n Leqqran aseggas n 1936, yuγal yekcem γer wulmud deg uγarbaz n tusnawit afransawi. Di 8 magu 1945, yesεa 15 iseggasen kan di leεmer-is, itteka di tmesbanit-nni id-yellan deg temdint n Setif mgal lbaṭel imahrasen n tmurt n fransa, yugi tudert n ddel, dγa yettwaḥbes 4 wagguren. Yemma-s tγil dayen yettwanγa, dγa ifuk fell-as usirem,tesleb. Tkemmel ussan-is di sbiṭar n Blida. Aseggas n 1946 yessufeγ-d adlis-ines amezwaru, d amud n isefra. Di 1948, yuγal d aneγmas deg weγmis Alger Républicain. aseggas n 1951, yunag γer tmurt n Fransa. Di 1955 yessufeγ-d yiwen wedlis le cadavre encerclé. aseggas mbaεd, di 1956, yessufeγ-d adlis-nni yettwassnen ugar wiyaḍ, win is-yarnan azal, wagi d Nedjma i tuzrigin n Seuil. Aseggas 1959 yessufeγ-d Le Cercle des représailles. Gar iseggasen n 1966 d 1970, yerna yessufeγ-d sin yedlisen nniḍen,wigi Le polygone étoile akked L’homme aux sandales de caoutchouc. Ass mi id-yuγal Yasin Kateb yettidir di Lzzayer,yettaxer i tira n yedlisen, yuγal yettaru amezgun s tutlayt n taεrabt n Lezzayer, dγa yesbedd yiwet n tiddukla n umezgun d netta i yellan γef uqaruy-is. Ger tecqqufin-ines yettwassnen ; Rrfed tabalizt-ik a Muḥ (1971), Tiγri n tlawin aseggas (1972), Ṭṭrad n 2000 iseggasen (1974), Palestine yettwaxedεen (1975). Kateb Yasin yecrew-d aṭas n warazen s tegzi-s, aseggas n 1963, yewwi araz n Jean Amrouche, id-sudes tamdint n Florence n tmurt n Ṭelyan. Aseggas n 1975 yewwi araz n Lotus n yimyura. Aseggas n 1980 yewwi araz amenzu n yizem i wmezgun, Académie Simba et Corriere Africano. Aseggas n 1987, yewwi araz ameqran aγelnaw n tsekla istefka taγlift n yedles n tmurt n Fransa.
Ayen id-yeğğa Kateb Yasin d aggeruj ur nettfaka, tisutwin i d-iteddun ad-tid-afen. Yasin yemmut deg waggur n tuber aseggas 1989 i temdint n Grenoble, tamurt n Fransa. Yuklal ayen yugaren tajmilt acku dneta id ajgu n tsekla Tazzayri.
Islam Bessaci