Taddart n At yexlef, i ibaɛden s wazal n 04 yikilumitren ɣef ugafa n ussamer n tɣiwant n Mceddalla, i d-yusan ɣef ussamer n lwilaya n Tubiret, tettidir lexsas n waṭas n wallalen n tudert. Ɣas akken taddart-a tettwassen s wakal yelhan i tfellaḥt akked ttjur n uzemmur neɣ lfakya. Annect-a yeǧǧa imezdaɣ n taddart-a ad d-sbeynen lɣiḍ-nsen ɣef lḥif i ttidiren acḥal d aseggas, acku ur sɛin ara aman n tissit, lgaz n temdint akked wammas n yidles d wannar n waddal ideg ara yuraren yilmeẓyen rnu ɣer-s tazeqqan ntujjya. Maca ɛlaḥsab imezdaɣ n taddart-a, i yellan deg wazal n 1000 deg-sen, nnan-d dakken: “taddart-nsen tettwaɛzel ladɣa ssebba n ubrid ixesren akked lexsas n trissiti n yiberdan i yeǧǧan tugdi ad-teɣli fell-asenladɣa deg wussan n cctawi”. Ihi ɣef waya imezdaɣ n taddart-a gren-d tiɣri i yimḍebbren n tɣiwant n Mceddala akked yimḍebbren n lwilaya ad d-rren lbal-nsen ɣer taddart-nsen, s tirziwin ara d-xedmen i waken ad zren uguren ideg ttidiren, yerna ad asen-d-fken lemɛawna ama deg wayen yerzan tafellaḥt neɣ lebni n tmezduɣin. Syin akkin, ttwalin d akken ma yella ur asen-d-frin ara uguren-a wekkden-d d akken ad xedmen timesbaniyin, acku d tifrat taneggarut isɛan ger yifasen-nsen iwakken ad asen-d-slen yimḍebbren.
Bousbaine.S