Akken i as-yenna Matoub deg wawal-is :’’s ciṭ n ṣwab maaaaaḍi, maḍi…’’Ihi, akka i teḍra deg tama-agi n Tamda, taγiwant n Wagennun imi tiklti n usfugel n yennayer akked lmulud tekka-d γer kra n yimdanen i yellan ttqesiren gar-asen. Yenṭeq yiwen yenna-asen :’’nekk ad d-seddqeγ azger i taddart’’, syin yerra-as-d wayeḍ : ‘’ula d nekk ad d-rnuγ wayeḍ’’. Ihi, seg wa γer wa armi sawḍen ad d-seddqen 10 n yizgaren. Mcawaren gar-asen, syin fran-tt d rray-nsen. Qesden taseqqamut n taddart u sarsen lamana gar yifassen-is. Γef wanect-agi, dγa, i aγ-d-yemmeslay Mass Samir Haddad, imḍebber n taddart n Tamda u d aselmad deg tesdawit Mulud Mεemmri n Tizi Uzzu, yenna-d :’’qesden-aγ-d wigi i d-iseddqen izgaren-a i wakken ad asen-efk afus n tallelt. Nwala yewweḍ-d yennayer akked lmulud, dγa nenna-as yefka-d Rebbi sebba. Nefreq tigawt-agi γef sin yiḥricen : lğemεa nezla 3 yizgaren d lwaεda, ma d ssebt nezla 7 n yizgaren-nni-nniḍen nexdem timecredt.’’ Ma γef yiswiyen n temlilit-a, ikemmel yenna :’’ass-a, temlal tassa d wayen turew. Lwaεda-agi, texleq-d yiwet n teswiεt n lferḥ gar yimdanen. Llan kra d iseggasen ay-a ur mwalan, ihi, ass-a yessemlal-iten-id yennayer d lmulud. Yerna am wakken i d-nni&gamma,; asfugel-agi yusa-d kan akka, ur nebni ara fell-as’’. Ula d wid iḥedren din, iεeğbiten leqdic-agi, γef wanect-a, dγa, i d-yenna. Mass M.Akli Salhi ula d netta d aselmad deg tesdawit n Tizi Uzzu :’’lwaεda-agi, texleq-d u ad tesnerni assaγen gar yimezdaγ n zik n Tamda akked wid n tura.’’ Ma d Mass Ramdane Boukhrouf, imḍebber deg tesdawit yenna-d :’’ayen akk icudden γer yidles-nne&gamma,; igerrez.’’
Deg taggarra nemlal d yiwen urgaz i d-yusan seg Bgayet yenna-aγ-id :’’akken kan ttḥiwwiseγ anda ara čče&gamma,; dγa εerḍen-iyi-d kra n yilmeẓẓyen γer lwaεda-agi mi d-εeddan deg ubrid s tkerrust.’’
I usmekti, Tamda deg-s i tlul Claire Chazal taneγmast n tilibizyu n Fransa TF1.
Hocine M.