Tisiswa ḥdaqqrent
Leḥzen yettcali
Tiɣaltin ssusment
Iṭij mi yeɣli
Tilawin slalwent
Mi yenṭel yitri
Mačči d lmut n Rebbi
Mačči d taččert i s-teččur
Yugi lbaṭel ad t-iɛebbi
Yugi ad s-selsen agennur
Yugi ad t-ḥesben d inebgi
Anda i t-id-iṣaḥ umur
Yennuɣ lbaṭel s wawal
Yak ikkes fell-as sser
Azref yerra-yas-d azal
Yeqqar-as dima: « kker! »
Aṭas i iḥemmel akal
Win akken i s-d-ifkan aẓar
Imɣi d azegzaw gezmen-t
Yeɣli-d ɣef wakal yeqqur
Amaziɣ nwan-t leqqmen-t
Ɣef wayla-s ad yezzi aɛrur
Acḥal d nutni sɣarayen-t
Netta ur yeɣri ur yeqqr
Azamul n ccna amaziɣ
Yecna aṭas (ɣe)f tlelli
Yenna: « D lbaṭel i ugiɣ
Ttnadiɣ lḥeqq ad yili
D Tamaziɣt kan i bɣiɣ
Tayeḍ urd iyi-d-tecqi »
Ɣas yemmut mačči baṭel
Yemmut gedra n Tmaziɣt
Yedder am umusebbel
Iteddun ɣer twaɣit
Ɣer deffir yeǧǧa-d aɣbel
Wissen amek ad-ɣ-d-taf tmeddit
Itri deg (yi)genni ittreqriq
Tafat-is tsemɣi-d tismin
Tettaweḍ ɣer yal amḍiq
Tessaki-d akk tiɣaltin
Aɛdaysi yegra-d deg ṭṭiq
Yedder amzun ddaw n tmedlin
D tafekka n Lwennas i nɣan
Tiktiwin-is ttcalint
Lemmwal-is yiwen i d-sɛan
S tmettant tura seftin-t
Yuɣal deg-neɣ d win yellan
Deg wul dima nettawi-t
* Le Rebelle
Malek Houd