Ttidirent tuddar n yiɣil ǧiber i yettabaɛen ɣer twinast n Sedduq n lwilaya n Bgayet, lexsas d lḥif meqqren deg yal taɣult, d annect-a i aɣ-d-wekkden yimezdaɣ n tuddar-a, acku ttwalin d akken imḍebbren n usqamu n tɣiwant n Sedduq akked usqamu n lwilaya ur xdimen acemma iwakken ad rẓen lḥif d lexsas i ttidiren seg timunent ɣer da, ɣas akken tuddar-a fkant-d aṭas n yimeɣrasen i tegrawla n Lezzayer 1954, maca annect-a ur aten yeslik ara seg lḥif deg lawan ideg ɛeddan 53 n yiseggasen ɣef tmunent n Lezzayer. Ihi, imezdaɣ n tuddar-a mazal-iten sburren lḥif d leɛtab seg lexsas n waṭas n wallalen n tudert yelhan. Ihi ɛlaḥsab yiwen seg yimezdaɣ n tuddar-a ʺFares Awartilan ̏ yenna-d belli tuddar-a sɛan-t lexsas deg yiberdan, lgaz ladɣa deg wussan-a n tegrest, trissiti n yiberdan akked wammas ideg ara ḍeggren iḍuman. Rnu ɣef waya, iwekked-aɣ-d dakken imḍebbren waɛden-ten-id acḥal n tikal s ferru n wuguren-a maca deg tilawt acemma ur t-id-xdimen. S wakka i d-gren tiɣri i tikkelt-nniḍen i yimḍebbren i wakken ad d-afen tifrat i lexsas-a s lemɣawla.
Bousbaine. S