Akkin i tilawt dinna i tella tidet. Ass n laṛebεa 13 deg wagur n fuṛaṛ i tekfa temzikkent i yexdem unaẓuṛ Toufik Hadibi deg uxxam n umezgun Malek Bouguermouh n temdint n Bgayet. Timzikkent-a yekkan dduṛt, tebda ass n 04 deg wagur n fuṛaṛ, tefka tagnit i waṭas n yimdanen i d-yerzan akken ad unagen deg umaḍal asugnan (surréaliste) i d-yebna unaẓuṛ-a ilemẓi i d-ifesren tifelwiyin-is di tzeqqa n TRB. Ayen yefkan lwelha deg temzikkent-a, d iɣunab (styles) imaynuten i yessemres unaẓuṛ ladɣa imi yeffel akkin i uglam n ugama am wakken nuɣ tannumi nettwali ɣer yinaẓuṛen-nniḍen, netta yekcem ɣer umaḍal asugnan, amaḍal n tirga ara yeǧǧen amdan ad yunag sdaxel n tfelwiyin yemxalafen i yega seg wasmi i yekcem ɣer unnar-a n tẓuṛi. Aya mebla ccek d ayen ara yesnernin s waṭas taẓuri tamaziɣt ladɣa imi anaẓuṛ Toufik Hadibi d ilemẓi i yella mazal ad yexdem ugar n wayen akka iɣer yessaweḍ. Tuget n wid i d-yerzan ɣer temzikkent-a, yal wa amek i yessebɣes anaẓuṛ Toufik Hadibi, netta daɣen yefṛeḥ s usebɣes-agi, yefka lweεd akken ad ikemmel deg ubrid-agi ara yesnernin taẓuṛi s umata.
Mokrane Chikhi