Yuɣal ubrid yettawin si Tizi-Wezzu ɣer Lezzayer tamanaɣt d amecwar i ssan yiɛeswiqen ur nferru. Wid yetteṭṭaf ubrid-agi ( terra tmara ad ruḥen ɣer Lezzayer neɣ d tuɣalin syen ɣer tmurt) zgan qqaren « ad iṣṣer Rebbi kan » imi gar ṣbeḥ akked tmeddit ur zṛin acu ara d –yennulfun deg-s. yuɣal ziɣ ubrid d taqerract yezgan tundi. Tineggura-agi qrib ulac ddurt deg ur yettwergal ara ubrid dagi. Tikkelt di Tedmayt, tayeḍ di Lwed Aɛisi, tiyeḍnin anda nniḍen. Kra n wid yeṣɛan ugur akked yimḍebren ɣef « ih » neɣ ɣef « ala » ad fɣen s abrid ad ssun idɣaɣen, rmel ad siɣen rwadi n tikuryas, imir win yeṭɣamen ad iɛeddi. Imdanen- agi yettergalen abrid ur d- cligen ara deg yimyinigen yeṭṭef lḥewj n tirza deg umecwar-agi. Ur nḥerwalen ara amer ahat yella umḍin, neɣ deg tilawin, arrac imecṭeh iweqɛen di tcerket uddin. Acu n ddnub n yimyinigen-agi akken ad asen- reglen abrid ? Mačči d abrid neɣ sin deg imesberden yettaɣen amecwar- agi beṭlen lecɣel-nsen ɣef lijal n yiɣulad- agi i d-ttafen zdat-sen yernu ur bnin . Ass-a yuɣal qrib alamma s tmara i rezfen medden ɣer Lezzayer, imi amecwar- agi yuɣal d alejlej, yestewḥac, yeskukruy, yessefcal. Zik, niqal d isergalen n yimsurta i yettɛetilen tikli armi tikwal laqent nnig xemsa n tsaɛtin ara yewwet umdan akken ad yaweḍ ɣer wanda yebɣa, tura yennerna-d ɣer taluft inegzumen- agi n yiberdan yesluɣen tagnit almi d ulamek. Ayen yessewhamen ugar d akken anect-a yezga yettuɣal-d , zun akken d urar. Mi as- yeɛreq i walbaɛd acu ara yexdem ad yessedhu iman-is s usuddu n ubrid. Tidet, amdan ilaq ad yessuter izerfan-is ticki ttwameḥqen, ilaq ad iqelleb ɣer lḥeq-is ma yemmečč, maca d awezɣi ad yili usuter-agi ɛala ḥseb n wid ur nednib ur nexdim. Ur ilaq ara ad yeglu uzegzaw s uquran. Ur ilaq ara tilelli n wa ad terr tili ɣef tilelli n wayeḍ nniḍen acku ma tkemmel akka imdanen ad kecmen urar n yiɣersiwen, dɣa imir win iwɛan i wayeḍ irkeḍ-it, win yernan wayeḍ ixbec-it. Deg lawan deg wid teɛna tsertit knan ɣef tefranin i d-iteddun, ahat yewweḍ-d lawan akken tamsalt- agi n urgal n yiberdan ad as- id- afen tifrat, akken wid ur nexdim ssiya ur ttilin ara d tadla gar tuccar n wid yezzuzren timenqas gar texliǧin n tudert n yal ass n yimdanen.
Ussan i d-iteddun ad d-begnen anwa i yerran uguren d ugdud deg wul-is, anwa i yerran fad n leḥkem deg yimi-s !
Ait Slimane Hamid