Imezdaɣ n lwilaya n Tizi Wezzu am nitni am yimezdaɣ n twilayin nniḍen ttidiren deg yir taswiɛt, ladɣa ussan-agi ineggura anda tamɛict tuɣal ɣlayet mačči d kra. Uguren ggten, lameɛna lixsas n uxeddim d win i-d yeglan s teswiɛt- agi, almi tawacult ur nesɛi ara imassen anda nniḍen ur tettidir ara akken iwata. Azal n 11% n yimezdaɣ tḥuz-iten twaɣit- agi ur nesɛi isem ma mačči d win n tiggulelt. Aya, nettaf-it s tudert deg tnezduɣin ur nwulem ara, ur nesɛi ttawilat am waman, trisiti…d wayen nniḍen am lebɛed ɣef yiɣerbazen d sbitarat. D liḥala i yeǧǧan tiwaculin-a ttuṣenfent gar tid yenxeṣṣen neɣ ahat d tigellilin. .
Gar 67 n tɣiwanin i yellan di lwilaya, 24 deg-sent beggnent – d azal n 52 n liḥalat n tiggullelt. S wakka gar wazal n 22 053 n twaculin gar-asent 197 431 d tigellilin, aya ma neẓra belli lqidar n yimezdaɣ n lwilaya yewweḍ ɣer 1n umelyun d 20 000 n yimdanen, leḥsab I ɣ-d-tefka tnemhalt n temetti neɣ la DAS. Ger tɣiwanin- agi i tḥuz taluft, d tin n Aqaru ladɣa tudrin Kisum d Busliman anida leḥsab n twaculin tigellilin yewweḍ ɣer 100%. Taddert n yiḥennucen deg tɣiwant n Uzeffun, ur tt-tezgil ara taluft-a, imi 80 n yigellilen i yellan di 100 n yimezdaɣ. Deg tɣiwant n Aɣrib, tudrin n Yizriwen Hubil d Bubeker azal n 45 ar 70% n yimezdaɣ nsent d igellilen. Deg usammar d umalu n lwilaya taswiɛt d yiwet. Deg unẓul, ad nadir tudrin n Tizi Mellal d At Tudert, d Tirual d At Bumeheni, Talla Meqren d Ulad Azzi d Tizi Ɣennif ad naf azal n 110 n twaculin I yenxessen. Deg tɣiwanin n M’Kira d At Yaḥia Musa tudrin n Tamediqt, At Sliman, Rabet lixsa yuɣ tamurt. taddart Tamdiqt weḥdes deg-s azal n 99% n twaculin I yenḥafen. Ayagi mebla ma neḥseb imeɛâdar, I yewweḍ wazal nsen ɣer 24 922 deg lwilaya, gar-asen 8083 d imeɛdar di tfekka, 2202 xuṣṣen deg yiẓri, 1410 ur sellen ara ma d 268 sɛan leɛḍer yemgaraden. Ala 7700 gar-asen i yesfaydan s lemɛwna n 3000 n yidinaren i waggur. Swakka ad d- iban belli lwilaya n Tizi Wezzu d tin yettidiren deg lixsas s sebba n unɣas n yisenfaren n unegmu n tdamsa ara yefken tagnit n uxeddim.
Dalila I.