Seg wasmi i yettwareṣṣa d lwali ɣef Bgayet di taggara n yulyu 2015, mass Ould Salah Zitouni yerra-d aṭas n ussirem i yimezdaɣ n lwilaya mbeεd acḥal n yiseggasen n useεḍel n yisenfaren n unegmu i d-yellan s sebba n ustehzi n yimḍebbren n lwilaya. Deg tdiwennit i as-iga uɣmis La Dépêche de Kabylie ddurt yezrin, mass Ould Salah Zitouni yessebgen-d lebɣi-s akken ad yekkes leεḍil ɣef yisenfaren n unegmu di lwilaya. Yessebgen-d ladɣa abgas-is akken ad yekfu s lεejlan asenfar n ucuddu n lwilaya n Bgayet ɣer ubrid ameqqran Asammar-Amalu, rnu ɣur-s leqdic-is d tazliwin-is akken sbiṭer Khelil Amrane ad yuɣal d ammas n udawi asdawan CHU ideg ara setnefεen ladɣa yinelmaden n tmezdayt n tujjya n tesdawit Abderrahmane Mira n Bgayet. Deg tdiwennit-a mass Ould Salah Zitouni, yemmeslay-d ɣef waṭas n yisenfaren i ijerred akken ad mmagen deg yiseggasen i d-iteddun ladɣa deg uḥric n tewnaḍt d lebni n tmezduɣin di leṣnaf yemxalafen. Akken ad d-nesmekti, di kra kan n wussan ideg yettwareṣṣa mass Ould Salah Zitouni d imḍebber amezwaru n lwilaya n Bgayet, yuɣal yisem-is mucaε ɣer yimezdaɣ, ilmend n tarziwin i ixeddem yal tikkelt ɣer tɣiwanin . Rnu ɣer waya, imi d netta i yellan d sebba ɣef tuɣalin n usqamu n lwilaya ɣer lxedma, segmi asqamu-ya yeqqim yeḥbes i waṭas n wayuren s sebba n war amsefhem ger yiεeggalen-is.
Mokrane Chikhi