Ass n 28 deg ctember iɛeddan iga-d yimḍebber amezwaru n waɣir n Bgayet yiwet n tirzi n usefqed i kraḍ n tɣiwanin i tesɛa tdayra n Yiderginen: Iderginen, Tasexriwt, Ayt Smaɛel. Mass lwali d win i d-yeẓran ihi ddeqs n yisenfaren ed wamek leḥḥun lecɣal-nsen. Imi deg Tsexriwt yesḍal ladɣa ɣef Wammas n Usileɣ Amsadur, tamkarḍit n tɣiwant akked uxxam n tɣiwant deg Lberj n Mira. Send ad ikemmel ɣer Ayt Smaɛel anda iwala tazwara tasnawit tamaynut i yettwaldin taggara-ya kan, ed waddad deg tella. Send ad d-isub daɣen ad yezzi tamuɣli ɣer temkarḍit n tɣiwant i mazal akken tella kan acḥal-aya tura, imi ulac tadrimt swayes ara mden yiqeddicen-is. Akken ɣer taggara n tuffɣa-ines i Udrar n Fad, yenwa mass lwali ad iḥewwes i uxxam n tɣiwant, ad n-iwali amek tga tegnit n uqeddic, ladɣa imi sey-a d asawen sɣur tɣiwanin ara ttwanefkayent tkarḍiwin n nnekwa. Deffir n tirzi-ya ihi, yuli ɣer turin n yiɣermanen (citoyens) yiwen n usirem d ageɛmer, amer ad d-teglu s tidet s ubeddel i ttraǧun, i tneflit n temnaḍt-nsen deg kra n yiḥricen xersum, am win n baylek, idles, akked tdawsa (santé).
Mhenni Xalifi