Amerḍil, awal-agi d-yuddamen deg wemyag (le verbe) arḍel, d kra n wussan-nni izaden ɣef wagur n yennayer, wid d-ittwaksen deg win t-id-iḍefren, fuṛar. Amerḍil-agi d tagnitt yeǧǧa-n yennayer ad iselmed tamsirt i yiwet n temɣaṛt t-iɛuyṛen. Zzik, ɣef wakken d-eqqaṛen yemɣaṛen d temɣaṛin, d yettɛawaden ayen sen-d-ennan lejdud-nsen, ɣef wagur n yennayer iqesden fuṛar, agur ger tnac n waguren yesɛan kan 28 n wussan, d yiwet n temɣaṛt i yellan deffir n wayagi. Yiwen useggas, zik maḍi, agur n yennayer yusa-d yemxallaf yak ɣef wid t-id-yezwaren. Imdanen ur ḥulfan ara maḍi i cetwa. Ulac tisiqas nni n usemmḍ ten yesqujjuṛen, ulac igefrawen-nni d iɣellin am yiḍ am was, ulac daɣen ideflawen nni yettsuddun tibbura ɣef teɣzi n ledwar, illa melmi d agguren maḍi, ladɣa tuddar d yezgan deg tiɣilt. Imdanen ur uminen ara ayen ttwalin d wayen ttidiren. As tiniḍ, ttidiren deg tallit n tefsewt, ala ijeǧǧigen i yulac. Yiwet n temaɣṛt tekker taṣebḥit akken ad tawi taqeḍɛit-is n tɣeṭṭen-is ɣer tezgi (lɣaba) akken ad ten-t-eks. Mi tmuqel ɣer berra, twala igenni yeṣfa am zzit, tenna-yas: “A buh a yennayer, tkecmeḍ ur d-ebbiḍ ara, tefɣeḍ ur teǧǧiḍ ara ». Imir tuder ɣer udaynin akken ad d-efsi tirbegtin i tɣeṭṭen-is. Tamɣart, ur nezri d acu tt-yettṛaǧun, tezwar lmal-is zdat-es, tebbi abrid metwal tizgi. Skud tleḥḥu tettwali asigna yettnejmaɛ-ed ɣer tlemmast n igenni. Yennayer yewweḍ-it nnif, akken kan yesla i wawalen n temɣart izuzel ɣer fuṛaṛ ad d-yerḍel kra n wussan akken ad d-yerr ttaṛ-is, acku wid-is kfan. Ger teswiɛt ɣer tayeḍ, ibeddel lḥal : asigna isberber-ed yak ɣef tuddar di yal tama, ifṛax la ttfarfiren akken ad nnejmaɛen ɣer leɛcucu-nsen, lebṛaq yekkat-ed s imecɛalen-is, aṛɛud la yzehher tikli n wass. Ma d tamɣart yuɣ-itt lḥal di tlemmast n lexla. D lmuḥal ad yekfu lweqt akken ad d-ennejmaɛ s axxam-is. Din din kan ibra-d Sidi i lxiṛ-is : yeɣleb ayen d iɣellin ayen d-ittalin. Tenger dunnit s ugeffur yekkaten s uzayaḍ. Ur isnexfet ara ar almi yebbi laɛmeṛ i temɣart lak d teɣeṭṭen-is. D tagi i d tamacahutt n umerḍil tthabin yak yemdanen deg tallit-nni. Deg was-nni, mi d-gran kan wussan ineggura n yennayer, ad tafeḍ imdanen ttheggin-d isɣaṛen s wayes ara seḥmun, akken ma yella wexṛab n lḥal meqṛen ur ttqujuṛen ara deg usemmiḍ.
Zenia T.