S lḥir d ameqqran i d-meslayen imezdaɣ n taddart n Zina, i ibaɛden s wazal n 10 yikilumitren ɣef tɣiwant n Yiɣil Ɛli deg Bgayet, ɣef tegnatin i yedlen lḥif d lexsas n wallalen tudert deg yal taɣult, ɣas akken taddart-a taddart-a d tin yettwassnen s ccbaḥa n ugama-s maca imḍebbren n tɣiwant akked lwilaya ɣef uqerru-nsen lwali zzin-d s uɛrur i taddart-a. Ɛlaḥsab tarkeft (comité) n taddart-a rwan lḥif acku ur sɛin ara ibardan yelhan, lexsas n waman n tissit i d-yettasen tikelt deg ddurt, trissiti deg yiberdan, allalen n usiweḍ (transport) akked yiqalusen ara yessuffɣen izulixen berra n taddart seg tama-nniḍen, wekden-d daɣen d akken rwan tazla ɣer yimḍebbren ladɣa asqamu n lwilaya maca deg tilawt acemma ur asen-t-id-xdimen. Seg tama n uselway n tɣiwant iwekked-d d akken taɣiwant amur n tedrimt i d-isaḥen taɣiwant ur yettɛeddi ara 02 yimelyaren annect-a d lmuḥal ad iqid taɣiwant i wakken ad texdem isenfaren i teḥwaǧ, ma dayen yerzan lexsas n waman n tissit yenna-d belli yella usirem imi ad d-ssiwḍen aman n tissit seg ubaraǧ n Tici ɣer tɣiwant s umata, ma d allalen n usiweḍ ufan ɣer taddart-a ufan ugur acku imsawaḍen gguman ad xedmen ɣer-s. Syin akkin iwekked-d belli aɣerbaz amenzu yezmer ad yeɣlaq axṭar iselmaden ttabṭalen s waṭas ɣas akken deg yiseggasen i iɛeddan taɣuri deg uɣerbaz-a tella akken ilaq imi aselmad i yellan yesɣarayen deg-s yezdaɣ dinna maca uɣalen ḥebsen-t yimḍebbren n usegmi d uselmed anda d-wwin deg umḍiq-is taselmadt i ibaɛden s wazal n 80 yikilumitren ɣef uɣarbaz d annect-a i tt-yeǧǧan tettas-d tikelt deg ddurt. Syin akin yenna-d belli taɣiwant txeddem ayen ilan fell-as iwakken ad d-af tifrat i wuguren-a i tettidir taddart-a maca s lemɛawna akked tdukkli.
Bousbaine S.