Ali Makour d yiwen gar yirgazen n tẓuri d tsekla taqbaylit d yidles amaziɣ. D win yefkan tudert-is d temẓi-is i tira d tmedyazt n teqbaylit, d yidles amaziɣ s umata. Dda Ali ,d amedyaz, d aneɣmas, d amaru ameqqran n tmedyazt n tmaziɣt tatrart.
Ali Makour, d yiwen seg tsuta n tegrawla tazzayrit. Ilul-d ɣer ddunit ass n 07 deg waggur n unbir n useggas n 1953, deg taddart n Laԑzib Bugeni n Σmer deg tɣiwant n At Ʃisa Mimun, deg lwilaya n Tizi Uzzu, di tmurt n Leqbayel. Ur d-as-tettnefk ara tegnit akken ad isṭebṭeb deg tewwurt n uɣerbaz, imi i d-ilul d ameԑḍur n tfekka, laԑmer yekcim lakul, yerna yif aṭas deg tezyiwin-is yeɣran. Maca tesɣer-it ddunit, yelmed-d aṭas s timawit seg yimɣaren d yimusnawen n taddart-is. Yebda tira n yimagraden (les articles) s tutlayt n tyemmat tamaziɣt, deg uɣmis «Tamurt» deg useggas n 1991, yella yettaru s yisem « Ʃli Ayt Maceɣ ». Syin akin, yuɣal yettaru imagraden s uzwel « Tabrat », deg uɣmis umayur «Iẓuran», i yellan yetteffeɣ-d yiwet n tikelt i waggur. Dda Ali, d amaru u d amedyaz deg yiwen n lweqt imi yura yiwen n udlis d ammud n yisefra d tmedyazt s snat n tutlayin. D win i wumi yeffka azwel «Ul yerɣan», yesuffeɣ-it-id deg useggas n 2001ɣer tezrigin « El Amal » neɣ « Asirem » s tmaziɣt Dima deg uḥric n tira n tsekla tamaziɣt, maca tikelt-agi deg tewsit tesrit, imi yura yiwen n wungal s wazal-is i wumi isemma «Timlilit n Tɣermiwin». Am waken, daɣen, yura aṭas n tmucuha n zik, gar-asent «Ḥend Buṣṣelṭan» i d-yettusuzergen s ɣur Aseqqamu Unnig n Timmuzɣa « HCA ». Ali Makour, yuwi-d semmus (05) n warrazen n usebɣes, seg tfaskiwin n tmedyazt ideg yetteki, ama dagi di tmurt n Lezzayer, neɣ tid n tmurt n lmaruk.
ADAOUN Abdelghani