Jean El Mouhoub Amrouche ilul di 7 fuṛaṛ 1906 di Lezzayer, i lǧiha n umalu n wasif n la Soummam, deg yiwet ger tuddar n tɣiwant n Iɣil Ali, di lwilaya n Bgayet. Yemmut di 16 yebrir deg 1962 di Paris. Yemma-s d Faḍma Nat Mensuṛ tinna yuran yiwen wungal anda d d-eḥka tameddurt-is d lemḥani tesɛadda, dagi di tmurt-is neɣ dihin deg yinig. Ungal-is umu tefka azwel « Histoire de ma vie », tessufeɣ-it-id deg useggas n 1968. Weltma-s d Taos, ula d nettat d tamyarut n waṭas n wungalen d yedlisen. Deg useggas n 1910, tawacult n Jean Amrouche tunag ɣer tmurt n Tunes. Jean yellan yezweṛ mliḥ di tɣuṛi, yeffeɣ-ed d aselmad. Yebda axeddim di Sousse (Tunes), uqbel ad yerzu ɣer Fransa anda ikemmel tlata n iseggasen n tɣuṛi. Imir yuɣal-ed ɣer Sousse anda iselmed di tesnawit (lycée) tasekla, uqbel ad yerzu ɣer Bône d Tunis, anda ikemmel amecwaṛ-is n uselmed, anda yemlal amedyaz Armand Guibert. Isefra-as imezwura isufeɣ-iten-id deg 1934 d 1937. Mi terɛed tegrawla taɣelnawt tis snat, Jean yemlal-ed amyaru André Gide ( yebbi araz n Nobel n tsekla deg useggas n 1947) di Tunis. Msuḥaben-d lwaḥid ɣer Lezzayer. Jean Amrouche di furar 1944 ar almi d furar 1945, yella di Lezzayer. Deg useggas n 1945 ar almi d yunyu 1947 yella di Paris, maca yedha-d d tesɣunt-is (la revue) « L’Arche » anda d ttarun yemyura imeqranen n fransa am Antonin Artaud, Maurice Blanchot, Henri Bosco, Joë Bousquet, Roger Caillois, Albert Camus, René Char, Jean Cocteau, André Gide, Julien Green, Pierre Jean Jouve, Jean Lescure, Henri Michaux, Jean Paulhan, Francis Ponge… Deg yiwen n lweqt, Jean Amrouche yedha-d daɣen deg leqdic deg umaṭaf n radio. Ledic-is, ula dagi, icud ɣer tsekla. Yexdem tidwilin di Tunis-R.T.T. (1938-1939), Radio France Alger (1943-1944), lak di Radio France Paris (1944-1958), anda d yattaɛṛaḍ imyura, imedyazen d imusnawen iqedcen deg wennar n tsekla. Gar-asen ad d-nebder Gaston Bachelard, Roland Barthes, Maurice Merleau-Ponty, Edgar Morin, Jean Starobinski, Jean Wahl, Claude Aveline, Georges-Emmanuel Clancier, Pierre Emmanuel, Max-Pol Fouchet, Jean Lescure, Kateb Yacine,… Zyada ɣef tmedyazt-nni d yenṭeq s yiles-is, Jean Amrouche, yedren aṭas deg yinig wala di tmurt-is, yemmeɣ di tmetti anda d -yejmeɛ icewwiqen n leqbayel d isemyagar deg « Chants berbères de Kabylie » deg1939.
T. Z.