Gullen ur uɣalen deg webrid-nsen, arrac d teḥdayin yefkan awal i Hayet d twacult-is d akken as d-jemɛen idrimen i ylaqen akken ad terzu ɣer Fṛansa, anda ara s xedmen yiwet n « l’opération » akken ad tejji deg waṭṭan-agi yemluqan, le syndrome d’activation Macrophagique (S.A.M) winna yebbi-n, yuɣ lḥal, laɛmeṛ n weltma-s ɣef ḥdac n iseggasen, bḍen ɣer yeswi-nsen. Leqdic-nsen yeffeɣ di tlisa n taddart Adrar, di tɣiwant n Weɣṛib, yettekkin ɣer la daïra n Uzeffun, anda tezdeɣ tmuḍint-agi tamezyant (14 niseggasen) yebɣan ad tidir akken ad twali dunnit. Bedden ur risen, arrac-agi d teqcicin, d isbedden ahil-agi n wejmaɛ n yedrimen i Hayet, uklalen leqdeṛ meqṛen. Leqdic-nsen yessaweḍ ad d-yejmeɛ akteṛ n tlata n imelyaṛen ilaqen i tmuḍint. Leqdic-nsen yerra-d asirem i Hayet d twacult-is mazal yennuɣebnen ɣef yellit-nsen nniḍen sen-t-icelqef waṭṭan-agi. Leqdic-nsen ibeggen-ed daɣen d akken ur kfin ara lmumnin, mazal at lxiṛ, wid izemren ad atqen tarwiḥt i wmuḍin. Deg ledwaṛ yezrin, ilmeẓyen-agi xedmen tirebbaɛ, tid yettwaferqen ɣef imekwan anda qwan lɣaci, ladɣa deg iberdan imeqṛanen, tiseddawiyin, les gares,…Tiɣṛi n twacult n tmuḍint sawḍen-tt i medden s tirni. Sxedmen ladɣa azeṭṭa n Facebook, imaṭafen n radio, tilizṛit, iɣmisen, tidukliwin…wten yak yissen-t, ula d leḥyuḍ n iɣerbazen, sbiṭaṛat, tiḥuna, leqhawi, di tuddar, neɣ di temdinin, lesqen tiwṛiqin anda d-sfehmen d acu n waṭṭan yeṭfen Hayet d wacḥal n yedrimen s ilaqen akken ad terr « l’opération » di Fṛansa. Idrimen mden-d, tamsirt tebbeḍ imdanen : anda tella tegmatt ulac tugdi.
Z. T.