Yezzi useggas γef tmettant n unaẓur i yesnarnin deg azal d ccan n yidles d ssinima n teqbaylit, Abderahmane Bouguermouh i tewwi tmettant ass n 03 furar 2013. Tiddukla n leqdicat n yelmeẓyen Horizon, rran tajmilt meqren i mmi-s n tmurt-nsen, ass n 31 yennayer almi d ass n 03 furar deg aggur ideg nella, γef teγzi n 04 n wussan. Tajmilt-agi tella-d deg wexxam n yelmeẓyen n Yeγzar ameqran tamnaḍt n ouzellagen, anda iḥedren deqs n yinaẓuren d yemdukkal-is. Ahil i ittewjarden d amarkanti, anda llant temzikniyin n ttsawar d yedlisen γef tudert n unaẓur, isaragen anda id-wwin ameslay γef umecwar γezifen yexdem unaẓur-agi Abderahmane Bouguermouh d usenεet isura yexdem ger-asen« Tawrirt Yettwattun, d Kahla wa Beida », syen yella-d umeslay d usqardec isura-agi. Di tegnitt am tagi issulef fell-aγ ad-nebder anaẓur icuban Bouguermouh xarṣsum stewzel n wawal acku aken nebγu newwi-d awal fell-as, ur nezmir ara ad d-nezzi yakk γef wayen yexdem, imi neḥṣa dakken taẓuri d lebḥer lqayen, d lebḥer wessiεen ur yezmir yiwen ad-tyelḥeq aken yebγa. Taẓuri n Bouguermouh teffka-d tafat i wallen, ttaxmam iwallaγ. Taẓuri-s tcuba iṭij n wass d tiziri n yiḍ. Acḥal d amdan iγeflen yessakki-t, yefka tisura i tsutiwin id-iteddun, swayes ara-ldint tewwura unekcum s ulawen anda teẓẓun tayri. Asaru yexdem « Tawrirt Yettwattun », yessengugga idurar, izegger mara lebḥur, yecerreg igenwan*, ur yettağğa amḍiq, yal tiγmert di ddunit yewweḍ-itt.Abderahmane Bouguermouh, yeffka azal meqren i tẓuri, yefka laεtab i yimman-is akken idles amaziγ ad-yifrir ger lejnas. Yesmenddeg allaγ-is,yeẓẓemmi-t aken ad iniwel taẓuri swayes yezmer ad d-iccekti, yessufeγ afrayen-is, yezreε tamusni-s d tẓuri-s ara d yeqqimen ilebda.
Islam Bessaci