Ɣef wakken ttwalin wid –nni i d-yelhan deg uḥric-agi n ddin akked tmetti, nnan-d d akken Remḍan-agi neɣ tuẓumin s umata yella seg zik n zik. Uqbel ad ilint neɣ ad d-banent ddiyyanat, ama d tamasiḥit , tudayit, tineslemt neɣ tid-nni-nniḍen. Ihi, uqbel ad d-yili u ad yettwaḥettem Remḍan-agi ɣef wid yettamnen deg ddin swayes umnen, yella, yakan, ɣer yimezwura i t-ixeddmen i wakken ad ssiǧǧhiden assaɣen gar tfekka-nsen akked d rruḥ-nsen. Meḥsub ad d-sneqqsen kra seg tfekka, ad t-hdun i rruḥ. Amek ? Ɣer wigi uɣur i d-yennulfa Remḍan, ttwalin d akken yal mi ara tili tfekka tufay, rruḥ ad yili d areqqaq, u mkul mi ara tili tfekka d tareqqaqt, rruḥ yettuzur. Ihi, seg wakken ttɛebbiden u ttqadaren rruḥ-nsen i ḥesben nnig-nsen u d netta ara ten-icefɛen asmi ara mten, xeddmen akk kra yellan i wakken ad uɣalen d ireqqaqen , syin ad yuzur rruḥ-nsen, ɣef wamek i ttxemmimen. Ihi, s kra n win yufayen, tewwi-d fell-as ad yirqiq ma yebɣa ad yili d aḥbib n rruḥ-is. I wakken ad yirqiq, tewwi-d ad yeqqim i laẓ. Acu kan, ass yecban ass-a, wid yettuẓumen, rennun deg tufayr imi setten ugar n wagguren-nniḍen. Ma llan wid yuẓamen ɣef wanect-a, ur wwiḍen ara s iswi ? Llan wid i d-yeqqaren, diɣ, ttuẓumen, zik, i trebbit Allat, d tarebbit n waggur. Aggur-agi, yettas-d d wis 9 deg leḥsab n wagguren n useggas. 9 n wagguren i tettɣimi tmeṭṭut i wakken ad d-terbu segmi ara terfed. Ihi, aggur-nni, imdanen ur tetten ara alamma walan Tirebbit-nni. Acu kan daɣen, akken kan ara tt-walin, ad d-ɣermen ayen kan ǧǧan. Tuɣal ɣer din. Syin, yusa-d ddin, u yenna-d d akken Remḍan d ajerreb : ad tjerbeḍ laẓ i wakken ad ak-ɣiḍen wid-nni yelluẓen, syin ad asen-d-tseddqeḍ. Meɛna, mi d-yewweḍ Remḍan, imdanen ttḥiwwisen ɣef wid i t-yeččan i wakken ad asen-agin ad ččen, ur ttnadin ara ɣef wid yelluẓen, i wakken ad ten-seččen. Ihi, s tezmert n yimensi-nwen, d tameggazt lɛid-nwen.
Hocine.M