« Nesaweḍ armi nefreq lḥuma d yiɣerdayen. Ar wass-a, ula d yiwen ur d-iḍal ɣer wayen i aɣ-yuɣen. », « nekni tura ad as-neqqar nezdeɣ deg temdint ! » ; s yimeslayen yecban wiyi s ɣ-d-mlalen yimezdaɣ n lḥuma Cité Douanière, yellan ɣer tama tamaddayt n temdint n Bgayet. Γas akken iṭij yeḥma, ccer d fad n remṭan rnan-d, imezdaɣ n lḥuma-ya, sebren akken ad nnalen lḥeq-nsen. S teɣzi wass nutni qeflen abrid yessufuɣen ɣer Lezzayer tamaneɣt. D tidet, lḥuma-ya tenḥaf aṭas. Iberdan, ula ara d-yini yiwen, ulac abrid iseḥḥan ! Ma lḥal d aɣurar kufren deg uɣebbar, ma d ageffur ntan yiḍarren-nsen deg waluḍ. Aman ma maren-d ttgelmimen. Seg yigelmimen i ttgelmimen waman ǧǧan-d lusex d lfuḥa n lmejrat. Ulac iqudas i usufeɣ n waman n cicmat. Mi nesteqsa acuɣer taɣiwant tebren-asen-d s uɛrur i yimezdaɣ-a, qqaren-d bnan berra i lqanun. Yiwen seg yimezdaɣ yerra-d s wawal i lhedra-ya : « mi ẓran lebni da yeffeɣ i lqanun, acuɣer ara aɣ-ǧǧen ad nesmir tidi-nneɣ d lmal-nneɣ umbeɛd ad ak-qqaren mačči d lḥeq ad nebnu. Mačči d lmenker i nebɣa ad nexdem, nettnadi imal yelhan i twacult-nneɣ. Ata acu i aɣ-d-yewwin ɣer da. Wama tenwim nebɣa ad nedder d imdukal d yiɣerdayen ? » Γef tmeslayt kan, mi nesfaqed ɣef wacḥal n yimdanen izedɣen deg la Cité douaniere, nufa azal n 300 twaculin i tt-iɛemren.
Mohand Ait Ighil