Deg wahil-ines n uwenneɛ n uqeddic-is, aserḍi n umsaɣ, ed ussuseɛ n tesna (surface) n ubḍaw n ugaz, takebbanit taɣelnawt n ufraq n ugaz tɛewwel ad tessiweḍ ijeɛbuben-is ɣer tɣiwanin n usamar ed unẓul-asamar n Bgayet, am Suq Letnin, Iderginen, Ayt Smaɛel ed Tsexriwt, sey-a ɣer taggara n useggas-a deg nella 2015. Maca daɣen i waṭas n tɣiwanin nniḍen n waɣir n Bgayet. Aya ira ad d-yini dakken seg yiɣzer n Bgayet aẓ akkin, akk timnaḍin ad ttwaqqnent s yijeɛbuben n ugaz n teɣrabt i ttraǧun yimezdaɣ am win yettraǧun win ur d-nettas. Yuɣ lḥal, ɣef taluft-a n ugaz n temdint gedged i mmugent aṭas n tiganin (grèves), i ttwabellɛen acḥal n tikkal yiberdan iɣelnawen i yinehharen. Ɣef waya, wid yerza uqeddic nwan ad ɛeddin ɣer tigawt, ad sbensen aḥeyyer n yiɣermanen s usiweḍ n ugaz i yixammen-nsen deg teɣzi n useggas-a deg nella. Lḥasul, 55 n tkebbaniyin i yeṭṭfen taggara-a tasunḍa (ordre) n uqeddic akken ad bdunt amahil-nsen. Ad d-nesmekti dakken ugar 2780 n yikilumiṭren n tuqqna i yellan, tettwafreq ɣef ddeqs n temnaḍin. Akken i d-yedda deg ulɣu n tmehla n ubḍaw n lgaz, i icudden ɣer tkebbanit n ufraq n usamer, ddeqs n tuddar i yeɛna usiweḍ-a n ugaz, am Ayt Smaɛel, Tasexriwt, Iderginen, At Ksila, Tamrijt, Tifra, Tawrirt Larbɛa, Cmini, Akeffadu, Tiban, Tawrirt Iɣil, Ayt Mendil, Adeqqar, Bulimaṭ, Fenya, Saket, Buxlifa, ed Msisna. Deg tɣiwant n Ayt Smaɛel, yetturaǧu ad d-tekk tuqqna seg n Seṭṭif, ad d-tɛeddi seg umḍiq mu ssawalen Aswel i yellan deg tilisa gar Bgayet ed Seṭṭif.
Mhenni Xalifi