Ayen ara iḍerrun deg tmurt n Leqbayel taggara-a, dayen ur iqebbel leεqel. Wissen, εni anwi akka i as-yedεan ! Ulac tin ur tt-nezgil. Ulac tawaγit ur tesεedda. Taneggarut n tneggura, d abaxix-agi yekkren deg tesdawit n Tizi Uzzu yettwasnen s yisem ‘’Bastos’’. Σlaḥsab n yisallen d wayen i aγ-d-nnan, tanezduγt n tesdawit-a tuγal d amekkan n lεer d tukksa n leqder γef lḥerma n tmurt n Leqbayel.
Xas ulamma, ulac tirect ur nesεi akerfa, meεna amekkan n tmussni d tussna i yellan, zik, d iseγ n yal anelmad d tnelmadt, yuγal taggara-a d lεib ad t-id-taddreḍ : d lεib ad d-tiniḍ qqareγ deg ‘’Bastos’’. D acu yessawḍen taswiεt γer wanect-a ? Dagi, timuγliwin mxalafent. Llan wid i d-yeqqaren, d lexṣas n cci, tinelmadtin ḥwağent aṭas n tedrimt deg tudert-nnsent. Llan wid yeqqaren d lqella n ttrebga : llant ttwaḥebsent deg uxxam, tura γur-sent tilelli iwumi ur zmirent ara. llan wid i d-yennan d akken tamsalt tettuxleq-d s γur kra n tamiwin i wakken ad cemten taqcict taqbaylit. Ineggura-a, sεan ttbut γef wanect-a. Qqaren-d :’’ amek yeṭṭuqet crab d lkif daxel n tesdawit γer teḥdayin-a mebla ma yella win i d-ineṭṭqen. Medden akk ẓran tessent u ttkeyyifent tnelmadtin εinani. Acḥal n tikal, dγa, i kecmen i yiγalen n laman γer daxel akken ad ṭṭfen kra.’’
Ussan-a, yeṭṭuqet umeslay γef tin i yessexdamen tiḥdayin-a. Nnan-d d yiwet i yerran iman-is d tanelmadt, deg leεmer-is 35 n yiseggasen n tama n Sour El Ghouzlan. D nettat i yeznuzun nnif n teqcicin-a i wid n berra. Dγa, γef wanect-a i d-kkrent tnelmadtin n tesdawit-a i wakken ad d-beggnent lγiḍ-nsen γef lεar-agi i tent-icemten, u i wakken ad d-inint mačči imi llant kra n tucmitin dγa tiḥdayin akk d tucmitin. ‘’Akken yebγu yili, amur ameqqran n teqbayliyin ṭtfent deg nnif-nsent.Mačči d yiwet neγ d snat ara aγ-yessimsen’’ I aγ-d-tenna Samia.
Hocine.M