Deffir n tikli talwiyant (pacifique) ed i d-tesuddes Tidukkla n Taddart n Krun, ed i gan ddurt yezrin azal n 60 d ilemẓi ɣer uxxam n tɣiwant n Ayt-Smaɛel i d-yezgan deg yiderginen, aɣir n Bgayet. Aselway n tɣiwant Mass Ɛebdun Nasir ed unmazul-is (vice-président) Mass Sadeq Rebbaɛi, heggan-d timlilit akked yimezdaɣ lǧemɛa-a yezrin deg uɣerbaz amenzu n yilmaten, anida i d-yella umeslay s tuget ɣef uguren n sɛan lɣaci akked yisenfaren PCD ed BW n tɣiwant. Ad nesmekti dakken, seg wayen akk ssuturen yilemẓiyen ad naf ladɣa aseggem n yiberdan d uxdam-nsen deg yimeḍqan anda ilaq tili muggen seg zik, am yiberdan ara yessisehlen tuffɣa i yimaɛḍar akked wid ara yekksen leɛtab n tikli, ama s tkerrust neɣ s uḍar, i yal yiwen ed tal yiwet, deg umedya n uṭaleb n wass, abrid aɣiwan <Taɛinsert – Tigratin – Lmerj Iɣil>. Rnu i waya, asuter n ubdaw n lecɣal deg usiweḍ n teɣbalut n tudert (aman) seg Lɛenser ɣer ucaṭu anda uqan yakan. Imezdaɣ n taddart dima cettkayen seg uɣilif-a ladɣa deg unebdu, i asen-yeqqlen d anezgum aḥeqqani. Aselway n tɣiwant d unmazul-is seknen-d ahil n yisenfaren n tedbelt deg tugdut tazedgant, ayen yemuggen, amek, melmi ed iwacu, rnan ssawlen i yimezdaɣ ad ilin d ineɣrumen (civilisés) ugar, ed ad ttwalin tilufa s tmuɣli tameẓẓult (logique), acku mačči ad yili yiwen ur t-tuqiɛ s tidet deg tneflit (développemen) d unamek-is, neɣ ur yefka azal i tgemmi-s (patrimoine) ed yidles-is, neɣ iɣunza almi dayen kan amsifham ed tdukkli ed tayri, maca tal tikkelt ad ireffed kan ifassen-is i nnfu iferɣen. Nesteqsa snat n tamiwin, tid ukud d-tella temlilit, yenna-aɣ-d uselway n AVK Mass Gemmac Idris: » nemmeslay ɣef waṭas n temsal i yeɛnan taddart, yal wa yebra-d i tmuɣli-s, nessaram ad tebdu tɣiwant deg usemres n lecɣal, akked ullethi ed taluft n internet akken i t-id-yenna Lmir, acku nekk ɣur-i kra ur yella alama ẓriɣ kullec deg wannar, daɣen ad greɣ tiɣri i taddart-nneɣ ad semmden akka deg tdukkli ».
Seg lǧiha-s, anmazul mass Sadeq Rebbaɛi yemmeslay-d s yisem-is d imḍebber deg tɣiwant: « s lferḥ d agaɛmir ay d-nga ttiɛad-a deg taddart n Ayt-Tɛisiwt, am akken ara nexdem dɣa akka, akked tuddar merra n tɣiwant yiwet yiwet. Ur yelli acu ara neffer, nemmeslay ed yimezdaɣ s wul zeddig, acku neẓra belli taɣdemt tinmettit (justice sociale) nexdem-itt, rnu i waya tal taddart tesɛa win i tt-id-yeskanayen deg ugraw aɣerfan n tɣiwant. Ma d lecɣal ur tettɛeṭṭil tɣiwant ad tebdu deg wid ɣef wacu nemmeslay, ad greɣ kan tiɣri i yilemiẓiyen-nneɣ ad sserbun tayri, ad nadin ɣef tmussni daɣen ».
Timlilit nezmer ad d-nini tseqqef s kra n wayen yesbensayen ma neẓra belli mi tebda, iqerruyen llan ttqellqen, wiyaḍ feqɛen, maca aselway n tɣiwant yeṛgem ad yefru iɣeblan n taddart yiwen deffir wayeḍ, ahat amezwaru seg-sen d ifilu n internet i ur nettɛeṭṭil xilla ad d-yaweḍ taddart.
Mhenni Xalifi