Ilaq ad d-nini dakken seg umihi-ines (danger) ameqqran ay d-yennerna uɣilif-a iɣef d-nettmeslay. Ma newwi-d s yisalli (lexber) s wayen akk ccettkayen yinehharen i t-yesseqdacen deg yiḍ deg wass. Ama d imezdaɣ n waɣir n Bgayet neɣ d wid n twilayin n usamar (ccerq) ladɣa, i t-yessexdamen xilla, skud la nhedder ɣef ubrid aɣelnaw wis 9. waya, segmi yettwaqfel ubrid n Ɛecba, abrid nniḍen n usellek, ɣef sebba n yiqeddicen n ureqqaɛ ed ussusaɛ i yettmaggan deg-s sɣur kra n tkebbuna, gar-asent yiwet n Taṭurkit, tuɣal tikli deg ufalu-ya n Txerraḍt teḥres, tewɛer, tessaggad, almi llan kra seg at tkeryas ttaǧǧan abrid aɣelnaw wis 9 ttɛeddayen seg wid wis 75 neɣ 43. Yuɣ lḥal, ula d asemmi ssawalen-as merra i ufalu-ya «lɣar n lmut», seg wakken ulac akk deg-s ulama d taɣawsa i yettaǧǧan amdan ur t-yettaggad, ɣas ma tikkelt iɛeddan aṭas n lecɣal n useggem i d-yellan deg-s, am wayen yerzan tafat i ixussen deg-s, akked asnuffes-ines neɣ assufeɣ n nnfu (aération). D asmekti kan, segmi yuɣal ufalu-ya yemxudneq akken, teḍra-d yiwet n twaɣit i ur d-negla, iḥun Rebbi, s yimattanen; mi yenneqlab deg-s ussan-a iɛeddan yiwen n ukamyun d ageɛmir almi yergel tikli i ddeqs n wakud. Aredmani, kra n win ikecmen afalu-ya ilaq-as kan ad d-yeṭṭef deg yiwen n wawal: aḥezzeb.
M. X