Tuggdi seg ucraḍ n waṭṭan n ubeḥri

Partager

Am yal aseggas, anamek n ukcam n tegrest d tiwin n yal ssenf d avirus i yettafen iman-is yettidir, yettili dɣa deffir n wacḥal d aṭṭan. Gar waṭṭanen-a ihi, d win i ur nzeggel ula d yiwen: azleg, neɣ abeḥri deg kra n temnaḍin (la grippe). Azleg d aɛdaw amenzu n yimdanen s umata deg tsemhuyt n usemmiḍ – ccetwa – almi tikwal yettḍurru aṭas win i yeṭṭef. Seg temḍerrit-a, ɣas llan wid ijebbden usu d ussan neɣ d imalasen (ddurtat) akken ad ḥlun ad selken, llan wiyaḍ, drusit, ttruḥun almi ttwaɣelben, ssufuɣen seg-s iẓiɣer, ladɣa imɣaren ed yimuḍan idumen.

Ɣef waya, yeɣtes Uɣlif n Tezmert ad yeldi seg tura tiwwura n ucraḍ i win yebɣan ad as-yili uzleg d afessas. Acraḍ ad ikemmel alama teffeɣ tegrest, yettusemma akkin i meɣres n useggas i d-iteddun 2015. Maca aɣilif yellan yekka-d sɣur kra n yiɣermanen (citoyens) i ugin acraḍ-a acku ugaden ad yesɛu ccɣel nniḍen deg tfekka bexlaf amennuɣ akked uzleg. «Nekk ur zmireɣ ad qebleɣ ad cerḍeɣ netta ẓriɣ aṭas n ṭṭebbat i yettagin acraḍ-a. Amek tebɣiḍ ad nesɛu nekni deg-s laman ?». I aɣ-d-tenna yiwet n teḥdayt i nesteqsa. Ɣef waya, atan ur terkid taluft-a deg wallaɣen n medden, wa yebɣa ad yecreḍ ikukra, wayeḍ ur yebɣa ur ikukra, wiyaḍ heggan ad qablen azleg am yal aseggas, awi-d ukan ad yili d aḥnin. Mhenni Xalifi

Partager