Iyuzaḍ

Partager

Ass-agi ufiɣ-d imdanen yeffɣ-iten laɛqel ɣef yiyuzaḍ, yal yiwen yeččur-d ifassen-is, a bu sin a bu tlata.

Wissen d acu i yeḍran akka ? waqila d ass agerɣlan n yiyuzaḍ, neɣ ahat d tafaska n yiyuzaḍ ?

Yennayer akked taɛacurt mazal d wwiḍen, tafsut tɛedda ! D aḥeggan, ur zellun ara deg-s iyuzaḍ.

Nniɣ-as ad ɛeddiɣ ad steqsiɣ lɣaci ayen akka d ttaɣen iyuzaḍ s tuget :

-A winnat, ayen akka id uɣeḍ ayaziḍ ?

-Walaɣ medden akk ttaɣen-d, ula d nekk uɣaɣ-d.

Zzin ɣer wayeḍ nniɣa-as :

– A winnat, ayen akka id uɣeḍ ayaziḍ ?

-Yeffeɣ-d yiwen weqjun deg uqelmun, yenna-d : «Win ur d-nuɣ ara ayaziḍ, ad yemmet d amcum.

Lɣaci ttamnen s menwala, tt-babban tuggdi ɣef yeɛrar-nsen. Lɣaci yebḍa ɣef 3 yeḥricen. Llan aga dur nettxemmim ara, am umedya n umezwaru-nni, ɣur-s tiɣawsiwin ttɣimant akken llant, ur tt-beddilent ara udem. Llan at wallaɣen yeḥfan am umedya n wis sin-nni. Wagi teddun akken ddan waman, ṭṭafaren kan wiyaḍ am iderɣalen, imdanen teddu ɣer zdat nutni ttazzalen ɣer deffir. Llan agad yettxemmimen ttaẓen ɣer sdat, wigi d agad iwumi yeqqar umyaru Taher ǦAƐUṬ «Tawacult yettaẓen ɣer sdat».

Tedduɣ s axxam, nniɣ-as deg wul-iw : «Ḥader kan ahat ula d tameṭṭut-nni-inu teṭṭef-itt tawla-agi n yiyuzaḍ ?. Bḍeɣ s axxam, temmuqel-d s ifassen-iw ilmawen, yenna-iyi-d :

-Amek akka ! Ur d uɣeḍ ara ayaziḍ ? Akka i t-xedmeḍ yal ass, ur tenḥerwaḍ ara ! i lukan ad nenger ?

-Nekk tikelt-a, gulleɣ ad iliɣ d argaz mačči d ayaziḍ, tebra cclaɣem-iw ur t-id uɣeɣ.

Azekka-nni ruḥeɣ s amahil-iw ar uɣerbaz. Ufiɣ-d deg ubrid imdanen bedden wa deffir wa, yal wa yettraǧu nnuba-s akken ad d-aɣen iyuzaḍ. Walaɣ yiwen irewl-as uyaziḍ iḍfer-it deffir akken ad t-id yeṭṭef dɣa qrib i tenɣa tkarrust, beddeɣ steqsa-ɣ-t, nniɣ-as :

-Acimi d tuɣeḍ ayazid ?

-Aɛekkaz yewten taddart, awer yizgel !

-Wagi d ayaziḍ ineqben taddart.

Ay akka d tallit deg-i d negra, amusnaw ur yesɛi azal, yefka-d tamsirt i yemdanen yiwen ur as-yessli. Yeɣli-d yiwen uderwic deg yigenni, yiwen t-iwala, yiwen ur t-yessin, yefka-d tamsirt dɣa imdanen akk ḥessen-as.

Busad Ḥemmar

Partager