Ɛeddan 25 iseggasen seg wass mi yemmut ubabat n tmaziɣt Lmulud At Mɛemmer. Inelmaden n tesnawit Si Lḥasen Uṭaleb n At-Yanni xedmen tikli seg tesnawit-nsen ar tmeqbeṛt n Dda Lmulud, ssersen-as tameqqunt n izeǧǧigen. Llan deg temlilit-agi sin iselwayen n tɣiwanin n At-Yanni d win n tɣiwant n Ibudraren. Fkan-d awal-nsen, yerna-d wawal n unemhal n tesnawit d kra n iɛeggalen nniḍen.
S yin inelmaden-agi kemlen abrid nsen ar tzeqqa tadelsant i irefden isem n Lmulud At Mɛemmer. Din, ẓran-d timzikeniyin d yisaragen.
Xas akken aṭas n wuguren i d-mugren inelmaden n tesnawit-agi, maca ssawḍen ar tmeddit n wass ad sweǧden ahhil yufraren. Bdan-t s ccna i d-tewwi terbaɛt n telmeẓyin, taɣuri n isefra d tmedyazin ɣef tmaziɣt d timmuzɣa. S yin tella-d tmezgunt umi qqaṛen: “Win iṣebṛen yettaf», i yesnecṛaḥen wid meṛṛa iḥedṛen. Smersen leqdic-agi-nsen s tmacahut i d-tulles yiwet si tnelmadin n tesnawit. Tessuli tmeɣra-agi s tuɣac d ccḍeḥ, ayen yessafesen ɣef wulawen.
Rnu ar leqdic-agi i d-sweǧden inelmaden n Tesnawit, tiddukla tadelsant “talwit” theggad ahhil i yeḍran si 26 furar ar umenzu n meɣres. Ccebḥen-t-id aṭas n yinazuṛen am Zayan, Zeddek Lmulud, atg.
Urak Lameyya