Ddurt-agi yezrin tuγal tejmilt γef teγzi n ssin n wussan i yiwen ucennay meqren n tezlit taqbaylit, id-yufraren di ccna agrewliw s tezlitt-is mucaεen « Ayemma εzizen ur ttru » wagi d Farid Σli.
Leqdic d win yebdan ass n 21 maγres di tγiwant-is Bunuḥ di temnaḍt n Buγni, ass wis ssin deg wexxam n yedles n Lmulud At-Mεemmar n temdint n Tizi-Wezzu.
Ahil n leqdic d amesbaγur anda i d-tella tirza γer uẓekka n unaẓur Farid Σli, timliliyin tinigiyin d usarag γef tudert d umecwar unaẓur, itimzikniyin yemgaraden n ttṣawar syen tella-d tikci n yigardasen usenmer i wid yukkan di leqdic-agi.
Anwa id Farid Σli?
Issem-is aheqqani Xelifi Σli, illul ass n 09 yennayer 1919 di taddert n Yixelfunen taγiwant n Bunuḥ. Yelmed almi id-yewwi agardas n wulmud amenzu ( certificat d’études primaires) γer yemrabḍen irrumyen. Syen yeğğa taddart-is, irruḥ srid γer Lzzayer tamanaγt, anda i yexdem lḥirfa n uxarraz.
Aseggas n 1937, yunag γer tmurt n Fransa, anda i yemlal akk d yinaẓuren izzayriyen am Muḥamed El Kamel, Muḥamed El ğamussi, Ccix Missum d waṭas niḍen, i yettaken afud s ccna i tnekra n tegrewla n Lzzayer.
Dγa deg seggas n 1951, dahmen-t yemḍebren n tmurt n Fransa dakken yella s deffir n txazabit id-yellan mgal yiwen n yemḍebbar meqren n l’ORTF. Syen yuγal-d γer tmurt-is Lzzayer, anda i yemlal d watmaten-is yeččuren d tayri n tmurt akked yemḍebren n tegrewla tazzayrit, am Krim Belqasem.
Deg seggas n 1956, Farid Σli yettwaṭṭef sγur lεeskkar n tmurt n fransa. Sarḥen-as-d deg seggas n 1957, yekcem γer tarbaεt tanaẓurt n ukabar n tirni n uslelli aγelnaw i yellan di tmurt n Tunes, syen nudan deqs n tmura n lbarani, anda suffuγen tiγri n wegdud azzayri d umennuγ γef tmunent.
Krim Belqasem yessuter di Farid Σli akken ad-yexdem tizlitt γef dema n tegrewla, din kan yesekles tizlitt-is mucaεen « Ayemma sbar ur ttru », d yiwet n tezlitt i yernan afud meqren i yimeγrasen n tegrewla, imazal ar turategra-d d asmekti ussan n ṭrad qessiḥen d lḥif i sεeddan yemdanen di tallit-nni n tegrewla.
Islam Bessaci