Taluft i yellan deffir n wannect-a mačči n wass-a, maca tettuɣal i yiseggasen tura, segmi bdan yimezdaɣ asuter n uxdam n ttawilat n tudert i ilaqen deg wid teɛna temsalt ama d imasayen (résponsables) n twilayt neɣ n tɣiwant, maca imi aṭas n tamiwin i yesɛuẓẓgen i tiɣriwin-nsen, ur rfident aɣilif-nsen, teggra-d ihi teččur lḥila n ssber-nsen, tettfeggiḍ.
Ayen yellan deg tecwawt n tsutriwin-nsen (demandes) ad naf d internet ɣas ma yella ula d aman ttkukrun yal mara d-yaweḍ lḥuman ɣef sebba n tuqin-nsen deg ucaṭu aqdim, ɛlaḥsab aselway n Tidukkla n Taddart n Krun Mass Gemmac Idris: « nekni ayen nessutur tura mačči d 5G, yeshel maḍi lemmer ay ttnadin inesdabuyen (les autorités) talwit d tifrat d lḥeq, nebɣa ad aɣ-d-xedmen ajerriḍ n tilifun ula i nekni, skud lxiḍ yeqreb, iɛedda sey-a sɣur-neɣ ». Nwala reffu seg taluft-a yettbin akken ilaq ula deg udmawen n yilemẓiyen i iɛeyyan deg uraǧu d tumnayt alama d ixef n tɣiwant akken ad wwḍen asibir, « annect-a ur yelli d kra ma mačči d asuter n lḥeq, tura aql-aɣ deg 2014, amek lxiḍ n internet nɛeffes fell-as kullas nutni ǧǧan-neɣ mebla internet » i aɣ-d-yenna yiwen n yilemẓi n 22 d aseggas » . Aselway n tidukkla yeɛreḍ merra iberdan n usuter s leɛqel, dɣa akken i aɣ-d-yenna dima, uran yakan ddeqs n tebratin i wid yerza ccɣel, « uriɣ aṭas n tebratin n usuter akken i d-yeqqar lqanun, ama i tmehla DOT deg Bgayet, neɣ i yimukan-nniḍen, ddurt-a i iɛeddan rran-aɣ-d belli atan dayen ad d-asen ad walin annar anda ara ttwasbedden lecɣal, nessaram mačči d awal kan, neɛya deg yir imiruten (promesses), axaṭer ma ulac atan ad ḥettmen imezdaɣ ur nezmir ad sebren kter, ad xedmen ayen akk walan ilaq ad t-xedmen ». Imezdaɣ n Taddart n Krun nnejmaɛen akked yiɛeggalen n Tdukkla n taddart mi akken i asen-d-rran yimḍebbren n taɣult-a (domaine) seg Bgayet, taggara msifhamen dakken ma ur d-rzan ara akken i d-nnan alama d taggara n ddurt-a, ad gezmen lxiḍ deg taddart. Ad d-nerr awellih dakken Taddart n Krun n wass-a mačči d tin n yiseggasen n 70, imi tura tegma, temɣur, tessufeɣ-d imaswaḍen (inspecteurs), d waṭas n yinemhalen, war ma nemmeslay ɣef yiselmaden d yinelmaden isdawanen i yeṭṭuqten nezzeh, ihi internet yuɣal d lebɣi ama n yilemẓi neɣ n umɣar.
Mhenni Xalifi