Tamedyazt d tin yeṭfen aswir ɛlayen di tmetti taqbaylit, ladɣa zzik-nni uqbel ad d-lalen wudmawen-nniḍen n tsekla. ɣef teɣzi n leqṛun, agdud yerra ɣur-es lwelha. Deg-s i yufa lebɣi-s, ladɣa imi ur yessexdam ara imru akken ad yagem timusniwin n dunnit, ad d-yini iḥulfuyen, ayen yettidir d wayen yettwali. Kullec yella tettawu yettarra ger yimi d umeẓẓuɣ. Tamedyazt taqbaylit d tin icudden ɣer can, si zman aqbuṛ, ar almi yuɣal d awezɣi ad tuɣal tilist ger tmedyazt d cna. Aneggaru-agi yusa-d deg umekkan n tira, acku tamedyazt tedda-d deg webrid n timawit. S yess id d-eqqimen isefra n imedyazen, s yess i tennerna.
“Cna zzik id tirefden d tilawin d imeksamen. Llan daɣen imeddaḥen ileḥḥun di taddert ɣer tayeḍ. Talɣa id-yeṭṭafaren isefra (izlan) tetteddu s llir. Di lweqt-nni, talɣa yeṭṭafaṛ-itt-id umendayer, tajewwaqt, lɣiḍa d ṭbel. Tilawin ulac ayen ɣef ayeg ur cnin-t ara. ɣef uẓeṭṭa qqaṛen-t: aẓeṭṭa yegren yekkes a Lalla-s ur ttayes. Sexdamen-t daɣen cna deg tessirt, azuzen, azenzi n lḥenni, timeɣṛiwin, tibuɣaṛin. Daɣen yella cna n leḥzen mi ara tili tmettant», id d-yenna M. Cherbi lak d K. Khouas deg wedlis « Chanson kabyle et identité berbère, l’œuvre d’Aï Menguellet”.
Cna n teqbaylit ibeddel udem. Yuɣal yettwasekles deg tesfifin. Ger imezwura id d-yebbin abrid n cna-agi amaynut ad d-nebder Cix Nurdin, Sliman Azem, id d-tebɛen aṭas n inaẓuṛen nniḍen deffir-nsen: Crif Xeddam, Taleb Rabeḥ Kamel Hammadi, Akli Yeḥyaten, Anisa, Nuṛa d waṭas nniḍen. Di cna-nsen, bbin-d awal ɣef tmurt n leqbayel d iɣeblan n tudert, tayri, tagmatt,…
Z.T.