Ddurt yezrin, ilemẓiyen n ddaw 16 n yiseggasen n Tdukkli Tanaddalt n Ayt-Smaɛel (USAS) llan di ttiɛad akked umezruy anida uraren timlilit taneggarut n telɣuɣa (championnat) n twilayt n Bgayet n Ddabex Uḍar berra n uxxam-nsen, akked terbaɛt n Tizi n Berber. Ilemẓiyen n Tdukkli llan sɛan sin n waqqayen d zzayed ɣef trebbuyaɛ i ten-id-yeṭṭafaren, maca akken ad ḍemnen talɣuɣa, ad ṭṭixren daɣen i leḥsabat-nni yesqelliqen, izmawen n Udrar n Fad ɛebban-as i uxsim n wass xemsa n yiswan (buts) ɣer yiwen. « Akka ur nettraǧu igemmaḍ n wiyaḍ, nerbeḥ newwi talɣuɣa, mebruk fell-aneɣ ». Ay d-yenna Kader Zuṭaṭ, aselway n Tidukkli Tanaddalt n Ayt-Smaɛel send ad d-yernu : « ilemẓiyen-a d imal (futur) n ddabex n uḍar n Ayt-Smaɛel, uklalen asnemmer ed usebɣes ed urray n uwellih i ɣur-sen, ula d Ayt Ǧudi asleɣmay n Yilemẓiyen n Leqbayel yuhem ɣef kra seg-sen ». S wakka arrac imdukkal n Maɛuc Bader Ddin aql-iten s tɣara tunsibt d ilɣuɣen n Bgayet i useggas anaddal 2013/2014, taggayt (catégorie) n gar 13 ed 16 n yiseggasen. Ihi ad asen-nini ayyuz fell-awen. Ad nger daɣen tiɣri i yirgazen n yixeddimen deg Ayt-Smaɛel akken ad muqlen i ɣur-sen ulama s cwiṭ acku akken yebɣu yili win yuklalen yuklal. Seg tama nniḍen ilemẓiyen n 20 d asawen i yetturaren deg uḥric n yiseɣ, ḍemnen tiɣimit deg uneggaru-a, segmi xedmen amɛadal n 3-3 akked Tdukkla Tanaddalt Taɛessast (AST) deg Bgayet, d ayen ara yeǧǧen imḍebbren n terbaɛt ad ḥezzben seg tura i tsemhuyt (saison) i d-iteddun akken ur ttagen tuccḍiwin n useggas-a. Ad d-nesmekti dakken tin yewwin talɣuɣa deg uḥric n yiseɣ d Tarbaɛt n Tmeẓrit.
Mhenni Xalifi