« Amedyaz yezmer ad yemmet ? ». Akka i yecna Mas Maṭub deg tezlitt-ines. Ass-a tiririn ɣef usteqsi-agi n Lwennas yella: » Ur yezmir ara ad yemmet ! ». Acku 16 iseggasen aya seg mi tewwi t’mettant, amedyaz, anaẓur lakked d wegrawliw Maṭub Lwennas mazal-it yedder. Deg t’mektayt n yimezdaɣ n tmurt n leqbayel lakked Leẓẓayer, ulac acennay yeqqimen d-azamul n weɣref am Maṭub. Yal ass medden hedren fella-s s wayen yelhan, acku iruḥ d-asfel i waṭaṣ n-imennuɣen, ama d ttugdut, ama d tillela, d tamaziɣt lakked d-izerfan n wemdan. Lwennas yefka ayen ɣlayen : iman-is, iwakken ad t-ali tidett, tina iɣum wagu. As mi tenɣan, as nni d tawaɣit id yeɣlin ɣef t’murt! Ass-a, ɣas akken iseggasen yezrin, ur wiḍen ara (ur ssawaḍen ara) ad settu-n Lwennas Maṭub, i kecmen deg wmezruy i lebda! Anwa ur necni ara tizlatin-ines? Anda yella weqbayli, att-aff-ḍ Maṭub. Izedeɣ-iten! Ketben isem-is deg laḥyuḍ n yal tama. Ttawin-d medden tizlatin-ines d-imedyaten. Akken is yenna Lwennas: »… »!. Akka i ttmeslayen. Deg ṭunubilat, deg lkiran, deg leqhawi, deg leswaq, deg yexxamen,…tizlatin n Lwennas mazal-iten « ttbaɛziqen-t » ! Ṛadyuwat lakked tiliẓriyin ula d nutenti srusun-t ed cna n Maṭub. Anda-tt tatut-agi ? Anda-tt tametant-agi n wegrawliw ? Ulac-it, maca yella. Tura mi « yemmut », yedder i lebda ! Nnan-d tella tamurt n leqbayel weqbel tamettant n Maṭub, d t’murt n leqbayel wembɛed lmut-is. Sin yeḥricen mxalafen. Maca agrawliw yeǧǧa-d isem-is. D-azamul n Leẓẓayer tatrart, tamagdayt. Amer kan ad ttuseɣren isefra-ines deg ɣerbazen, akka ad yeqqim d-amedya i tuttwin timaynutin. Ar ass-a lankit ɣef lmut-is mzal ur tewwiḍ ara ar tidett. Dayen yeǧǧan wid i t-iḥemlen nnuɣnan aṭaṣ.
Syphax.Y