D win yellan yettawaṭṭef nezzeh deg tuget n useggas-a 2014 anda yella yerwa allus gar ustudyu ed uxxam. Zedek Mulud ur yefka ara akud i wakud, nemgal (au contraire) yeɛreḍ ad as-t-yekkes d tukksa ɣas ma akud ad yeqqim d akud. Anaẓur iɛewwel ad iheyyi seg wul i umaynut-is, seld sin n yiseggasen tura segmi d-yessufeɣ aḍebsi « D abrid kan ». Tahregt atan yettban-d tetedda iseggasen-a ineggura akken ilaq i yidis n umeskar n « Tidderwect-iw ». Deg teɣzi n ugar n mraw n yiseggasen i tikkelt tamenzut ara d-yessufeɣ amaynu, sin n yiseggasen kan deffir n yiseɣrez (album) aneggaru. Iban-d waddad, yemmeslay-aɣ-d yakan tikkelt iɛeddan, dakken aḍebsi ajdid ad yili i ɣuct, dɣa ahendez-is iseḥḥa skud d tin i yellan, acku mi neqqel nesteqsa-t yebra-d i wawalen-a: « ur tban ara gedged ma yella i wass n 14 seg wayyur-a n ɣuct, maca ma tḍul maḍi i wass n 20 ». Ass n ɛecrin dɣa d ass anda ara yemlil azayez-is deg waɣir n Tizi Wezzu. Azemz (date) n temlilit n ccna i yettwasleḥmen seg 27 seg yulyu i 20 deg ɣuct, tasebba n leḥzen i d-tesres tmurt deffir n tɣelyawt n tmesrafagt taspenyult i d-tekra tkebbanit Ijerriḍen Ignawen n Lezzayer. Ihi ttiɛad ad yili ass n 20 ɣuct tameddit s tallelt n Tdukkla Tadelsant Amussnaw akked uxxam n tɣiwant n Tizi Wezzu, d tagnit ad temlil tasa ed way turew, maca daɣen n beṭṭu n tuɣac timaynutin deg rreḥba am tin, deg usayes, akked uzayez daɣen. Ɣef umaynu, win teɛna taluft srid yella yezzwar-d deg wawal dakken aḍebsi ara d-yeffɣen ad yemgerrad ɣef wigad nniḍen akk, yettusemma ad yili d amaynut s unawek asemdan. Dɣa d ayen i yeǧǧan imsefliden ḥaren i tɣara-nni n ccna i d-iteffɣen seg yiẓuran, acku ula d nutni ad ten-yessiɣ waya. Ad frawsen afriwes n timmeɣnest seg yimeslayen-nni, ad rwun ccbaḥa n tefyar mara ad asent-yettwammels uɛebber ed umeyyez ed wurrif. Yiwen seg yimekdiyen (fidèles) n unaẓur yenna-aɣ-d: « atan meqqar ẓriɣ melmi ara d-yeffeɣ umaynut-is, zemreɣ ad ak-iniɣ ad iliɣ gar yimezwura ara t-id-yaɣen ». Azal n Zedek Mulud ɣur wid iḥemmlen awal mačči n wass-a, skud anaẓur d amzil i d-irennun tamussni, d amwanes n wid yettmeḥḥinen, d takayt (réveil) n wid yeṭṭsen, d asirem n wid yettwalin tekfa taluft-nni, d anagi n tsuta, maca daɣen d aselmad, d amedya i yilemẓiyen. Ttiɛat ihi sin n yimalasen sey-a ɣer sdat s yimeslayen ed yiẓawanen imaynuten. Yeqqar deg yifyar n yiwen n uḍris seg yiseɣrez-a amaynut 2014 :
“Di Tizi Wezzu
teẓẓun tizdayin,
yeḥzen wuzzu,
ttrunt tzemrin“.
Mhenni Xalifi