Ass-nni n 07 deg yunyu 2014, teldi i tikkelt tamezwarut yiwet n temkerḍit deg uγerbaz amenzu ‘’Atmaten MOULA’’ n taddart n Tala Athmane i d-yezgan di tγiwant n Tizi Uzzu.
Asenfar-a i d-thegga tiddukla n yimawlan n yinelmaden n uγerbaz-a, yella-d s lemεawna n waṭas n tamiwin. Γef wanect-a, dγa, i aγ-d-yemmeslay uselway n tiddukla-a, Mass Mustapha OUKACHA :’’tamkerḍt-a, telli tiwwura-s axaṭer llan wid yellan deffir-is : imezdaγ n taddart, imεelman n lluzinat-agi n lbur, mebla ma nettu iγriben-nne&gamma,; yal yiwen s wacu i aγ-d-iεawen. Seg wasmi i nebda leqdic-nne&gamma,; i nerra asenfar-agi di ddehn-nneγ. Ass-a yewweḍ-d lawan yefka-d lγella. Yewweḍ-d lawan, acku seg waggur n yebrir ar ass-a nekni d ahembber deg-s am waklan. Cwi kan llan yiεeggalen-nni n tiddukla ‘’AJIE’’ i aγ-d-yefkan afus n tallelt, tanemmirt tameqqrant i yuklalen. Ma d ayen yellan deg temkerḍit, ad naf azal n 1000 n yidlisen akked 10 n yiselkimen (ordinateurs). Tamkerḍit, ad tefteḥ tiwwura-s i yal tasuta : inelmaden, iselmaden, isdawenen akken yimezdaγ akken ma llan.’’
Am wakken i tettunefk tegnit di temlilit-agi i kra n yinelmaden yimezwura n yiseggasen 1960 akken ad mlilen u ad d-smektin ussan n unekcum γer uγerbaz-a i yellin i tikkelt tamezwarut ass 12/12/1963, γef wakken i aγ-d-yenna yiwen deg-sen. Wagi d Mass Med BOUMALA i yellan akka tura d aselmad di tesdawit n Tizi Uzzu i d-yeglan, dγa, s yiwet n tugna n useggas aγurbiz 1968/1969 anda yella netta d yimeddukal n tneγrit.
Ula d inelmaden iban-d lferḥ deg wudmawen-nsen imi ẓran azal yesεa usenfar am wa. Akka, dγa, i d-tenna tnelmadt Liza FERHAT deg wawal-is sdat n yimawlan n yinelmaden, iselmaden d yimḍebbren n tγiwant n Tizi Uzzu.’’ Azul fell-awen. Nefreḥ ass-a, aṭas, s temkerḍit-nneγ. D ayen ara aγ-iεiwnen deg uγerbaz.Tanemmirt i wid akk iqeddcen di tiddukla-a.’’
Si tama-nniḍen, tamkerḍit-a, texleq-d amkan n uxeddim i yiwet i yeγran u ixedmen tannant γef lecγal-agi. Tagi d tamsiwt Razika HADDADOU i yufan d akken leqdic-a igerrez dayen kan. ‘’Anwa ara as-yinin, ad d-yaweḍ wass anda ara nesεu tamkerḍit deg uγerbaz ? Ssarameγ ad muddeγ akk tamussni-inu seg ul zeddigen, ladγa imi aγ-d-rran afud iεeggalen-agi n tiddukla n yimawlan n yinelmaden.’’
Hocine. M