Ayen i inedren d times deg yidurar-nneɣ deg wayyur n remḍan ur yesseqnaɛ ara ama d amdan i tt-issendaren neɣ d agama i yettilin deffir n waya mbaɛed astehzi n umdan. Lḥasul, ussan-d ineggura n ddurt yezrin mačči d wid i zmummgen i yimezdaɣ akk. Deg Bgayet, Tizi, Tubiret ed tamiwin nniḍen anaɣur d win izaden s tmes-a, tafesna n ḥammu tagamant ur telli d tuqɛidt rnu-as tin n tinna i yufan sdat-s tagella n lɛali; d adles neɣ d akicaw neɣ aberwaq neɣ d aqiqaw neɣ d taɣemmayt akken tebɣu tili. Ma d abbu d win yettafgen deg yigenni am usegna-nni amengur, ula d idurar-nneɣ ireggel tamuɣli bac ur nɛeqqel tizzegzewt-is. Gar yigejduren i d-yeḍran deg tẓegwa-nneɣ imalas yezrin, tama tagmuḍant (tacerqit) n Bgayet, deg Yiderginen, ad d-nekk winna n Bumejber. Times i yebdan abbelbel mi d-yekcem yiḍ n 11 seg ɣuct, tufa iman-is deg waṭas n yimɣan dɣa tedraɛ. Kra seg yiqeddacen n tɣiwant n Ayt-Smaɛel akked uselway n Tidukkla Tussnant Takulujit Takkuct (ASET), uzzlen s amḍiq s ukamyun n 6000 n tlitertin wissen ahat ad ssawḍen ad ḍebbren abelbul-nni i yelfan yakan deg yigenni. Mi i d-iban dakken ur ad tt-ttselliken ara weḥd-sen, yelḥeq-d dindin uḥuddu aɣarim i umḍiq, yuma yettak-d tallelt almi yesmures s tmara, yessexsi times-nni i yellan teffud. Aya mačči d tikkelt tamenzut ara d-yili deg Ayt-Smaɛel ed Yiderginen, imi ma nebder-d times n wussan ineggura n wayyur n remḍan, i yesbelɛen ugar n 3 n yihiktaren deg temnaḍt n Yiɣil Izeggaɣen akked azal n uhiktar deg udrar n Takkuct. Mi nessuter deg uḥuddu aɣarim isallen, yemmeslay-aɣ-d ɣef tinna n Ayt-Mbarek akked tin n Ureccaḥ deg tɣiwant n Tsexriwt, maca i ur newwiḍ ulama ahiktar i yiwen tikkelt-n. Aselway n Tidukkla Tussnant Takulujit Takkuct mass Ɛebdun Lkarim yettgalla ur iḥennet dakken timestin akk i yettnekkaren deg tamiwin-a, d afus n umdan i yellan deffir-sent. Ad d-nesmekti belli tikkelt iɛeddan yeṭṭef yiwen n yillumẓi n 17 n tefsutin i ara yilin yecɛel times n udrar n Takkuct imi d yiwen n uqcic, mi i ten-yufa akken ttnaɣen, i as-d-yemlan tidet yellan. Ihi aselway n Tidukkla yessawel i baba-s maca aneggaru-a yesbenneq isalli, yenna dakken mmi-s ur yettag iqeddicen am wi. « Times deg yidurar-nneɣ, amur agaɛmir d imdanen i tt-yessendaren, imdanen-a ur gzan ara d acu i d agama, d acu i d asaḍuf n twennaḍt. Ad ssendren times ad qqimen ttwalin, ttaḍsan ad as-tiniḍ mačči d iman-nsen ay kkaten ». Ay d-yenna Lkarim Ɛebdun, ilemẓi amdakkel n ugama. Tacrawt (bilan) i d-yexdem dima mass Ɛebdun deg taggara n remḍan, d tin i d-yesseknen dakken times ur d-yewwi ara akk ad tekker deg lǧiha-nni, acku mi yettekka ɣef wansi teqlaɛ tmes, iban ɛinani d amadan i d tasebba ur d kra nniḍen. « Wehmeɣ ma ɛni drus aqebli ed uɣamac n ssmayem almi i aɣ-d-yerna Bnadem deg ḥammu s usender n tmes, ad yehdu Rebbi lmumnin daya ». Aya tenna-t-id yiwet n tmeṭṭut s usḥissef. Times mačči d taɣawsa iɣef yesɛa azref yiwen ad yestehzi, acku aql-aɣ nettmeslay ɣef ugama, taɣbalut n tudert n umdan. Ma igerrez ugama ad igerrez umdan, ma yuden ugama, iban, ad yuḍen umdan. Ar tura ɣas ma tella tmentilt tagamant n ubbelbel n tmes s tseddart tabeztuḥt maḍi, maca aṭas ay d-yesnulfuy umdan, ama s uɛemmed neɣ uhu. War aɛemmed : mara yettḍeggir bu sin n yiḍarren ayen i d-yewwi Rebbi deg tẓegwa, ama ččurent neɣ uhu, am lbuntat n girru, ibrikiyen, akawitcu, zǧaǧ, akked d tɣawsiwin tiyaḍ swayes tettleqqim tmes ɣer yimɣi mara yeḥmu cwiṭ lḥal. S uɛemmed : dɣa tasebba-a d tawaɣit maḍi, acku amdan-n yenwa ad yessender times, yehwa-as waddad mara ad d-yekker ubelbul-nni awraɣ deg tizzegzewt, deg ugama ameḥduq. Dɣa ssenf n yimdanen qqaren-asen s tefransit « pyromanes ». Tidukkla Takulujit Tussnant Takkuct n Ayt-Smaɛel, dima tessehbibir mgal annect-a, ad snagin merra. D acu kan txus deg wallalen, d ayen i yeǧǧan aselway-is yerna-d: « lemmer ad afeg tallelt sɣur wid teɛna taluft, d awezɣi ad tekker tmes ɣer tama-a n Bgayet, acku ad ttɛussuɣ deg yiḍ, deg wass ».
Mhenni Xalifi