Ussan-agi timeɣriwin deg tama n At Ɛebbas, icudden krad n tɣiwanin: Iɣil Ɛli, Ginduz lakked Buǧlil, ttilin-t maḥsub yal ass. Tezha liḥala, imi ṭumubilat ta s deffir tayeḍ čurent iberdan s tiɣratin lakked d ṭbel. Ilmeẓyen n tama-agi dayagi kan i ttrajun: Timeɣriwin, i wakken ad zhun, ad ceḍḥen. Timeɣriwin semlal-ent tasa d way turu. Acḥal n widak ur nemẓer acḥal d-assegas, ttemliln deg tmeɣriwin ɣef uḍebṣi n seksu d weksum. D-au kan neḥḍar i kra n tmeɣriwin deg taddart n Iɣil Ɛli, anda neẓra aṭaṣ n laɛwayed nɛud negrent. Timeɣriwin deg Iɣil Ɛli lhan-t aṭaṣ. Mazal seksu d weksum d ttučit i serbayen dinna. Ɣas ma yella kra n t’waculin ḥemlen-t ad rnun-t tuččiyin nniḍen maca seksu d netta i d « qessam » n tučiyin ! Akka ihi, ɣas ma yella aṭaṣ n laɛwayed i ruḥen tagara-agi ɣef ayen yaɛnan timeɣriwin deg tama n’At Ɛebbas, maca timeɣriwin mazal sɛan-t lbenna. Neẓra akken deg taddart-agi yella-n ttamanaɣt n lɛarc n’At Ɛebbas, mazal sexdamen lbarud. Ṭṭerḍiqen iqarḍaṣen s timeguḥlin deg yiḍ, dayen i rennu-n lecbaḥa lakked sser i t’maɣra Lɛada-agi tella seg asmi i d yennulfa lbarud. Mači d lɛada-agi kan i yeqqimen teddar ar ass-a deg Iɣil Ɛli, ula d-iḍeballen mazal katen ṭbel lakked d lɣiḍa. Amackit-ent timeɣriwin anda llan iḍeballen yekkaten, dayen i renu-n sser, mači am « Discjokey » ifellu-n imeẓẓuɣen, s cna n » Raï » lakked d tizlatin tiɛarbubin ur nemɛin ! Ur n tettu ara lfal akk d timellalin tuftiyin i ferqen-t tlawin as ma att-kfu tmaɣra. Am zik nni, mazal tilawin d yirgazen farqen, ur xelḍen ara deg tmeɣriwin deg tama-agi n’At Ɛebas yeṭfen deg laɛwayed n leǧdud ɣas akken ttatrart. Nif mazal-it ibed d-agi. Akken neẓra, taqendurt n leqbayel tuɣal-d s lǧahd muqren tagara-agi. Tilawin uɣalen-t ttlusun-t tiqundyar n leqbayel s waṭaṣ. Dayen iɣ yeǧǧan ad nini belli lebbayel bɣan ad uɣalen ɣer laṣel, imi ufan belli tudert-agi tamaynut ur teffiɣ ara fell-asen. Akken nella mgal tatut, nebɣa ad n smekti s yiwet n massa, temmut acḥal aya. Tagi qaren-as Talaɛfifitt. D yiwet n massa yekkat-en abendir zik nni deg t’meɣriwin deg taddart-agi n Iɣil Ɛli. Tameṭṭut-agi sawalen-as d myal tamaɣra akken att-wet abendir, yuɣ lḥal t-ṣaḥa yerna teqwa. Tezmer att-wet abendir mebla ma teḥbes swayeɛ ! Talaɛfifitt tura t ttwattu, imi temmut ɣureṣ azal n 30 iseggasen. Necfa-yas-d as mi nella meẓẓiyit imi tekkat abendir ger t’lawin s yiwet n tezmart iǧehden aṭaṣ. Tiyita n ubendir sellen-as d medden deg berra ! Temmut Talaɛfifitt « yeguǧel » u bendir.
Syphax.Y