Σlaḥṣab n yisallen i d-yettawḍen sya u sya, qqaren-d d akken tamaziγt ad tuγal d tutlayt tunṣibt deg tmendawt i d-iteddun. Aṭas i isutren azref-agi : γer kra, d asuter aqdim, ladγa imeγnasen ; γer wiyaḍ qqaren d lawan akken tamurt ad temsawa akk d umezruy-is. Llan, gar-asen, ula d ixṣimen-nni n zikk n tmaziγt. Mazal ar tura, kra, kamim ! Mebεed mi d-yenna wiyen n yimḍebber d akken tamaziγt laqen-as ttawilat i wakken ad tuγal d tunṣibt, ayen ur qbilen ara imeγnasen, ibeggen-d ass-a, Mass Amara BENYOUNES deg udewenni ines i ‘’Jeune Afrique’’ d akken ilaq ad tuγal d tunṣibt i wakken ad as-ttunefken ttawilat. Yenna umaru amatu n MPA :’’ ass-a, ferḥeγ imi tamsalt n tmaziγt temsawa γer yimdanen n tsertit, ula γer widak yellan di tselwayt. Ma γef wid i yeqqaren llaqen-as ttawilat i wakken ad tuγal d tunṣibt, nekk ttwaliγ d akken ilaq ad tuγal d tunṣibt i wakken ad as-ttunefken ttawilat iwulmen.’’ Γer yimḍebber-agi, tamsalt n tmaziγt d tamsalt n tsertit mačči d tin n tussna. Akka, dγa, i d-yesmekti awalen n yiwen umusnaw afransi :’’ mi as-nnan d acu n umgarad yellan gar tutlayt d tantala (dialecte), yenna-asen : «d akken tutlayt d tantala i yesεan lεesker d ipulisen ».’’
Hocine.M